Sulmuesi polak e ka shtyrë me dy vite të tjera qëndrimin e tij te kampionët e Gjermanisë. Ai do të luajë me bluzën e bavarezëve deri në vitin 2021, ndryshe nga kontrata e mëhershme, që parashikonte një qëndrim deri në 2019-n.
Robert Lewandowski e la Borusian e Dortmundit në vitin 2014, në një drejtim të njohur për shumë lojtarë të kësaj skuadre. Ai iu bashkua Bajernit të Mynihut, dhe në 122 aktivizime ka shënuar 86 gola.
Vetë lojtari e shprehu kënaqësinë për kontratën e re nëpërmjet faqes elektronike të klubit gjerman, duke deklaruar se, “Jam vërtet i kënaqur që negociatat kanë sjellë një rezultat pozitiv, e që unë do të vazhdoj të mbetem i lidhur me Bajernin e Mynihut për disa vite të tjera.”
Karl-Heinz Rummenigge, një prej figurave qendrore të bavarezëve, nuk e fshehu gëzimin për zgjatjen e kontratës me sulmuesin polak.
“Në këtë mënyrë kemi garantuar që një tjetër nga shtyllat kyçe të skuadrës sonë do të vazhdojë ta veshë bluzën e Bajernit të Mynihut në vitet që vijnë.”
Lewandowski ka shënuar 11 gola në 14 javë të Bundesligës në këtë sezon; ai renditet i treti në listën e golashënuesve, pas Aubameyang-ut dhe Modeste-s. /tesheshi.com/
