Prej 24 oërsh nuk ka më paqe në PD dhe as që pritet të ketë. Dy zëra historikë të saj, Topalli e Imami i janë përveshur kryetarit Basha, një shenjë kjo që tregon se partia e madhe e opzitës nuk i ka hiç punët mirë në këto prag-zgjedhjesh.
Dyshes së njohur i janë bashkuar, ndonëse me një stil periferik edhe Bregu e Patozi, ndërkohë që Selami ka shfaqur një gjest befasues: është vënë krah listës Basha, edhe pse është ndër të munguarit e mëdhenj aty. Gjithsesi, sulmet Bashës po i vijnë ngamos, ku veçon Gjergj Lezhja, njeriut që hartoi listat e votimit ku Basha u zgjodh kryetar. Ai njihet si njeriu i organizimit të PD-së që nga viti 1991, një besnik i Sali Berishës.
Plus Lezhjes, në eter po bombardojnë të njëjtët njerëz, ounturage-i i Shkëlzen Berishës në mediat online dhe rrjete sociale.
Dhe të shikosh me vëmendje, në këtë sulm pak nga pak po bashkohen edhe të njëjtët njerëz agresivë që janë identifikuar si mbështetës të LSI-së dhe Ilir Metës.
Një panelist, i identifikuar si i afërt i këtij të fundit e cilëson Topallin si “gruan me më shumë burrni në PD”.
Ç’po ndodh realisht?
Pikërisht ditën kur Operacioni Ndërkombëtar i Monitorimit skartoi tetëshen e parë të gjyqtarëve që dyshohet se nuk justifikojnë pasurinë, bota politike ka nisur një “revolucion” që duket se synon një qëllim më të rëndësishëm: të ndalojë një përpjekje ndërkombëtare që mazhoranca dhe opozita, praktikisht Edi Rama dhe Lulzim Basha të drejtojnë Shqipërinë pas 25 qershorit me një pakt të qëndrueshëm social, ku nuk do të ketë më ndalim të procesit uragan të vetingut dhe ta çojnë Shqipërinë drejt hapjes së negociatave.
Qoftë me një koalicion të madh ndërmjet PS-së dhe PD-së, siç po flitet, nëse qarqe të rëndësishme ndërkombëtare do ta sugjerojnë ndoshta eshe përkohësisht si mekanizëm që Shqipëria të ketë një stinë të qetë reformash, ku veçon vetingu për t’u pasuar nga zgjedhja e Kryeprokurorit të ri, zgjedhja e Kryeprokurorit Special;. zgjedhja e Drejtorit të Byrosë Kombëtare të Hetimit. Këta kërkojnë të paktën 84 vota në Parlamentin e ri. Dhe sipas gjasave, PS-ja edhe nëse merr shumicën për të qeverisur e vetme, nuk do të mund ta arrinte kurrë të zgjidhte krerët e institucioneve të reja të drejtësisë.
Marrëveshja Rama-Basha tronditi menjëherë një pjesë të politikës shqiptare dhe posaçërisht polin e rëndësishëm Berisha-Meta, të cilët u takuan si për karshillëk të nesërmen e “dakortësisë së madhe” mes kryeministrit dhe kreut të PD-së.
Ja, vëreni njerëzit afër Shkëlzen Berishës, duke filluar nga ish-deputeti Keltis Kruja dhe një dorë gazetarësh. Ata po e sulmojnë aq keq Lulzim Bashën, vetëm disa ditë pasi e ngritën në qiell për marrëveshjen me Edi Ramën.
Vërtetë Lulzim Basha nuk është konsultuar me doktorin për listat e reja? Vetë ish-kryeministri, publikisht e ka thënë më shumë se dy herë këtë që ndodhet dorëjashtë, duke e sqaruar edhe me statusin e tij tashmë që nuk është më udhëheqës, por thjesht një politikan aktiv i PD-së.
Por pse e sulmoi Bashën atëherë nga njerëzit e tij në zemrën e fushatës?
Që, edhe pse ka brenda një arsyetim ndoshta edhe parimor, siç ishte ai i shkeljes së statutit të PD-së, politikisht është një “thikë pas shpine”, siç u deklarua edhe nga Eduard Selami,i cili mbështeti vendimin zyrtar të Bashës, edhe pse vetë ai ishte i përjashtuar.
Eduard Selami është njeriu më pro-amerikan në Partinë Demokratike, dhe këtë e ka dëshmuar hapur kur bëri të ditur se do të votojë reformën për drejtësi një vit më parë, ndërsa Basha ishte gati të bojkotonte.
Në kulmin e çadrës, Selami nuk u prononcua, duke shpresuar në marrëveshjen që amerikanët po punonin fort siç dhe e arritën.
Po praktikisht çfarë bëri Lulzim Basha që ka egërsuar aq shumë ounturage-n e Sali Berishës dhe çfarë ky i fundit synon, tashmë që fakti është i kryer?
Ilir Meta dha një mesazh të qartë pas takimit me Berishën më 18 maj, që këto dy pole pushteti nuk do të qënddrojnë indiferentë para një lëvizje të re në politikën shqiptare.
Lëvizje që u tentua në vitin 2016 me reformën për drejtësi, por që u shua që në themel nga ultimatumi i Ilir Metës për tërheqjen e ministrave.
Sot Meta dhe Berisha mund të mos i tërheqin ministrat, por mund të tërheqin Lulzim Bashën nga pakti që ka firmosur me Edi Ramën.
Kryesisht nga pjesa e dytë e këtij pakti, që nis që me njohjen e fituesit e deri në bashkëpunimin për reformat e mëdha.
Ja ky është përkthimi i këtij orteku të madh që ka nisur këto ditë, e që nëse do të ndalojë Bashën nga angazhimet e tij do të dalë i suksesshëm, por nëse kjo zhurmë nuk do të rezultojë efektive, pra nuk e bën kreun e PD-së të tërhiqet nga ajo që ka firmosur, e gjitha do të përfundonte në një “furtunë në gotë”.
PD-ja realisht sot drejton shumicën e qeverisë, e cila do të zgjasë deri në shtator kur të emërohet qeveria e re.
Ajo ka shumë mundësi në duart e saj: që të bëhet një bashkëudhëtare e një stabiliteti apo të shtyjë drejt destabilitetit, siç u tentua në ditët e çadrës.
Lëvizja e nisur brenda PD-së ka sinjale mjaft kundërthënëse…/tesheshi.com/
