Dalja e Rexhep Meidanit në skenë, si një kandidat për kryeministër të përkohshëm të një qeverisjeje “teknike” nuk duket gjë tjetër veçse një presion i Ilir Metës.
Një presion që mbështetet tek një grup “senatorësh” brenda Partisë Socialiste, të cilët tashmë e kanë të qartë se Edi Rama nuk do t’i kandidojë më për zgjedhjet e vitit 2017.
Por këtu qëndron pezull misteri Blushi. Me kë do të jetë deputeti rival i Edi Ramës?!
Ditën e djeshme, qarqe pranë LSI-së hapën lajmin se në drekën mes Koço Kokëdhimës, Ilir Metës dhe Rexhep Meidanit, do të jetë edhe Ben Blushi.
Por kjo rezultoi totalisht një bllof politik. Ilir Meta ka takuar mbrëmë në darkë Edi Ramën në vilën qeveritare të Durrësit dhe sipas burimeve, kreu i Kuvendit i ka bërë presion aleatit të tij që të mos guxonte të formonte një mazhorancë tjetër në Parlamentm siç thuhet që Rama i ka bërë gati 72 vota pa LSI-në.
Por çfarë fshihet pas variantit Meidani-kryeministër?!
Kjo ndodh vetëm nëse 40 votave të PD-së dhe 20 votave të LSI-së i bashkohen edhe të paktën 11 deputetë nga Partia Socialiste, apo 6 nga PS-ja edhe 5 të PDIU-së, nëse Meta arin të kthejë Shpëtim Idrizin nga deal-i me Edi Ramën. Por kjo duket e parealizueshme.
Varianti Meidani- kryeministër është një tentativë e Metës për të bindur njerëzit anti-Rama në PS se në 2017-ën do të jetë kreu i LSI-së ai që do të marrë qeverinë, ndaj duhet të marrin anën e tij.
Njerëz pranë Metës po përhapin në rrjetet sociale tezën se kreu i LSI-së Meta do të kryesojë qeverinë në vitin e ardhshëm.
Por qeverinë me kë?! Me PD-në apo me PS-në?!
Kjo duket më tepër bllof, pasi loja politike do të varet nga fati i zbatimit të reformës për drejtësi dhe tronditja e pritshme e politikës shqiptare.
Edi Rama për momentin është i qetë pasi i ka letrat e qepura, madje edhe me njerëz të LSI-së. Meta duke e ditur këtë i bën presion me përçarje të PS-së.
Kjo duket e njëjtë me skenë e KPD-së së famshme që bëri Fatos Nano në vitin 2002.
Por situata nuk është aspak e njëjtë me atë periudhë.
Një ndikim të madh në lëvizjet e gushtit do të ketë edhe vizita e Zv.presidentit amerikan, Joe Biden, i cili në fundin e mandait të tij do të bëjë një udhëtim ballkanik në Tiranë, Prishtinë dhe Beograd.
Kartat duket se janë vendosur gjetkë. Meta e di mirë këtë gjë dhe po luan me letrën e destabilizimit, duke u shitur si faktor kyç. Por terreni politik është në rrëshqitje…
/tesheshi.com/
