Irani ka emëruar një shef të ri të shërbimit të fuqishëm të inteligjencës të Korpusit të Gardës Revolucionare Islamike (IRGC), dhe nuk shpjegohet pse paraardhësi i tij u largua nga ky post.
Ramadan Sharif, një zëdhënës i forcave elitare të Iranit, tha se Hossein Taeb do të zëvendësohej nga Mohammad Kazemi, i cili më parë drejtonte Organizatën e Mbrojtjes së Inteligjencës, dega e kundërzbulimit të IRGC-së.
Taeb, i cili më parë ishte një zyrtar i lartë në ministrinë e inteligjencës të Iranit, iu bashkua IRGC-së në fund të viteve 2000 dhe në vitin 2008 u emërua udhëheqës i organizatës paraushtarake Basij.
Një vit më vonë, u formua një njësi e inteligjencës IRGC dhe Taeb u emërua shef.
Pse u largua nga ai post nuk thuhet, por përmendet vetëm se është emëruar këshilltar i komandantit të IRGC-së Hossein Salami.
Informacioni vjen dy ditë pasi u shfaqën thashethemet se Taeb ishte shkarkuar dhe asnjë zyrtar iranian nuk e ka komentuar këtë.
Gjithashtu, ky zëvendësim vjen në një kohë tensionesh me Izraelin, mediat e të cilit pretendojnë se Taeb qëndron pas operacionit të supozuar iranian për të vrarë dhe rrëmbyer turistë izraelitë në Turqi.
Në fillim të këtij muaji, Izraeli i këshilloi qytetarët e tij që të mos udhëtojnë në Turqi, sepse, sipas tyre, ata mund të jenë objektiva të iranianëve.
Disa zyrtarë të lartë të IRGC-së janë vrarë kohët e fundit. Për vdekjen e kolonelit të forcës Quds të IRGC, Sayyad Khodaei, për të cilin Irani fajësoi Izraelin, Teherani ka premtuar hakmarrje. /tesheshi.com/
