Qeveria e Kosovës nuk i ka realizuar 65% të objektivave të parapara për vitin 2015. Qeveria ka arritur të realizojë 57 premtime nga 160 sa kanë qenë të parapara në Planin Vjetor të Punës për vitin 2015. Kështu ka deklaruar lëvizja FOL, përmes projektit “Matësi i së vërtetës”.
Mbi bazën e të gjeturave, FOL shpreh shqetësimin e saj në lidhje me performancën e dobët të qeverisë për vitin 2015.
“Ky nivel i ulët i performancës duhet të përmirësohet pasi veprimet e parapara për vitin 2015 duhet të barten për vitin 2016 duke e bërë edhe më të vështirë arritjen e premtimeve dhe objektivave që do të ndikonin në përmirësimin e jetës së qytetarëve”, thuhet në njoftimin e FOL-it.
Nga 20 ministri vetëm dy prej tyre nuk kanë kthyer përgjigje në pyetësorët e dërguar nga Lëvizja FOL, ato janë: Ministria e Administratës Publike dhe Ministria e Punëve të Jashtme.
Ministritë me më së shumti premtime të thyera janë: Zyra e Kryeministrit e Ministria e Arsimit dhe ajo e Drejtësisë.
Ndërsa ministritë me më së shumti premtime të mbajtura janë: Ministria e Financave ajo e Punës dhe Mirëqenies Sociale.
/tesheshi.com/
