Kapiteni i kombëtares shqiptare, Lorik Cana, ka regjistruar paraqitjen numër 200 në kampionatin francez të futbollit dhe për këtë arsye skuadra e Nantes e ka nderuar 32-vjeçarin para duelit me Bastian, me një fanellë në të cilin ishte mbishkrimi “Cana 200”.
Mbrojtësi i kuqezinjve, pati 69 paraqitje me skuadrën Paris SG dhe 122 me Marseille-n, duke realizuar plotë 8 gola.
Eros Grezda nuk i është ndalur golit, deri sa ka regjistruar edhe një të radhës, kësaj here përballë kampionëve në fuqi, Dinamo Zagreb. Mesfushori shqiptar i Lokomotivës realizoi golin e barazimin në takimin e luajtur në Maksimir, mirëpo për fatin e tij skuadra e tij pranoi edhe dy gola të tjerë në fundin e ndeshjes, për ta humbur atë me shifrat 3-1.
Besart Berisha është sulmuesi i radhës shqiptar që vazhdon të shijojë ende aromën e golit. Berisha ka realizuar golin e parë nga penaltia për skuadrën e tij Melburn Victory në duel me Adelaide United. Ndeshja përfundoi 2-1 në favor të Melburn-it, me Besart Berishën që arrin në kuotën e gjashtë golave.
Në kampionatin e mbushur me shqiptarë, atë zviceran, shkëlqyen Tarashaj e Xhaka që fituan duelet me bashkëpatriotët e tyre. Grasshoppers i ka dhënë një shuplakë Zurih-ut duke e mposhtur me shifra të larta 5-0, epilog ky të cilin e diktoi edhe Shani Tarashaj, futbollisti shqiptar që realizoi gol në minutën e 64-të.
Atë më vonë e zëvendësoi Mërgim Ibrahimi, deri sa në këtë sfidë për skuadrën fituese u paraqitën edhe Alban Pnishi dhe Florian Kamberi.
Ndërkohë, për skuadrën e Zurih, u paraqitën Berat Gjimshiti si startues dhe Armando Sadiku që u inkuadrua 20 minuta nga fundi.
Në duelin tjetër, Taulant Xhaka me skuadrën e tij Basel ka mposhtur Luzernin e Migjen Bashës dhe Jahmir Hykës, 3-0. Xhaka dhe Basha e shijuan takimin 90 minuta, ndërsa Hyka u fut si zëvendësues 10 minuta nga fundi./tesheshi.com/
