Futbollisti brazilian i pensionuar Mario Jardel terrorizoi mbrojtjen kundërshtare në ditët e tij më të mira dhe të gjithë fërkonin sytë dhe pyesnin veten se si ishte e mundur që ai të mos luante për një klub më të madh se Porto.
Në një kohë kur brazilianët po dominonin planetin, Porto ishte i pari që vuri re sulmuesin e talentuar të Vasco de Gama-s, pastaj Gremio-s, duke e sjellë atë në Portugali në verën e vitit 1996. Deri në vitin 2000 ai kishte shënuar deri në 170 gola dhe kishte shkruajtur historinë e klubit portugez.
Ai më vonë kaloi te skuadra turke Galatasaray për 16 milionë euro dhe pritej të vazhdonte karrierën e tij të shkëlqyer. Por Jardel mori rrugën e gabuar dhe ra në ferrin e drogës, që nisi në Porto, siç e pranoi hapur në një intervistë disa vite më parë.
“Nëse do të luaja sot, do të vleja midis 150 dhe 200 milionë euro”, tha Jardel.
Pas Galatasaray, ai u transferua te Sportingu i Lisbonës dhe u shkatërrua duke mos shkuar në Kupën e Botës 2002 me Brazilin. Kur mbaroi karrierën, filloi të merrte gjithnjë e më shumë drogë dhe përfundimisht falimentoi.
“Unë merrja drogë, merrja kokainë dhe rashë në depresion. Në botën e drogës hyra krejt rastësisht. Kur bëhesh futbollist i suksesshëm, ka shumë gracka, miqësi të rreme e të ngjashme. Disa njerëz më ofruan drogë dhe fillova duke e përdorur atë rregullisht”, tha ai.
Jardel pranoi në një intervistë se të gjithë në Porto e dinin se ai po merrte drogë dhe më e keqja ishte në vitin 2002. Në vend që të ishte në Kupën e Botës dhe t’i sillte Brazilit titullin, Jardel konsumonte kokainë. /tesheshi.com/
