Paralelisht me konsultimet e grupit të Bashës për statutin e ri të partisë, grupi kundërshtar i tij me në krye Astrit Patozin do të nisin fushatën për legalizimin e franksioneve në parti.
Mbledhja e fundit e kryesisë së Partisë Demokratike tregoi se përplasja brenda kësaj partie ka arritur pikën e vlimit. Debatet mes mbështetësve të kryetarit të rikonfirmuar me zgjedhjet e korrikut dhe kundërshtarëve të tij shpërthyen valvulën dhe dolën hapur para syve të publikut duke treguar se ato zgjedhje nuk e kanë qetësuar situatën në parti, përkundrazi.
Burime pranë grupit kundërshtar të Bashës në PD i thanë tesheshi.com se lëvizja e tij nuk ishte e përkohshme dhe nuk do të fashitet me përfundimin e zgjedhjeve në parti, që ata i konsideruan farsë dhe nuk morën pjesë në to me kandidatin e tyre. Kjo lëvizje bënë të ditur burimet do të vijojë me intensitet të lartë me takime në bazën e partisë duke nisur nga e hëna e javës që vjen.
Takim i së hënës mes ish-deputetëve dhe funksionarëve të tjerë partiakë që janë pjesë e këtij grupimi do të përcaktojë dhe strategjinë e re të të këtij grupimi. Burimet bënë të qartë se synimi i lëvizjes tashmë është legalizimi i franksioneve në Partinë Demokratike. Ata duan të njihen zyrtarisht në statutin e partisë si lëvizja e mendimit ndryshe brenda PD-së. Pranë grupimit nuk i është afruar vetëm Jozefina Topalli, një tjetër kundërshtare e flaktë e Bashës, por e cila ka një lloj konfrontimi me Patozin për protagonizëm politik.
Takimet e tyre në bazën e partisë do të ketë këtë synim dhe fushata do të zhvillohet në të njëjtën kohë me turin që do të kryejë grupi i punës i ngritur nga Basha për ndryshimet në statutin e partisë.
Pra, në një farë mënyre, kjo lëvizje e kyundërshtarëve të Bashës me në krye Patozin dhe ku bëjnë pjesë shumë ish-ministra dhe ish-deputetë të PD-së, të lënë jashtë listave të deputetëve të qershorit, do të jetë një luftë për mbijetëse në PD. Nëse nuk do të realizohet legalizimi i franksioneve, pra i grupimeve me mendim ndryshe në parti, ata ose do të heshtin përgjithmonë brenda partisë ose do të krijojnë një lëvizje të re politike jashtë partisë mëmë.
Gjasat duket se janë më shumë për këtë të dytën, por burimet pranë grupit nismëtar të franksioneve i thanë tesheshi.com se presioni do të bëhet për të fituar peshën politike brenda strukturave partiake.
“Pas një takimi të grupit nismëtar do të nisin takimet në bazën e partisë në të gjitha rrethet e vendit. Ne e dimë se baza është e pakënaqur me këtë mënyrë drejtimi të partisë dhe me mënyrën e të bërit opozitë dhe do të kërkojmë mbështetje për lëvizjen tonë. Ne nuk kemi synim të largohemi nga partia, por të na dëgjohet fjala”, thanë burimet.
Por Lulzim Basha duke qenë në dijeni të organizimit të kundërshtarëve ka qenë krejtësisht i prerë dhe kadegorik në përgjigjen e tij pa pritur si do të shkojnë konsultimet me bazën e partisë.
“Sa kohë të jemi unë në PD nuk do të ketë fraksion në PD, por do të ketë hapësirë për këdo demokrat që të kontribuojë për qëllimin e përbashkët që është një qëllim kombëtar”, tha ai pas mbledhjes së kryesisë.
Mesa duket Basha nuk do të presë se çfarë mendon baza e partisë kur e bën një deklaratë të tillë ultimative. Mjaft të marrim shembull qytetin e Durrësit ku dega dytë më e madhe e kësaj partie është e përçarë prej kohësh, ku nuk ka akoma një kryetar legjitim, pasi Osman Stafa vijon të jetë “i ngrirë” me udhër të Bashës. Prej kësaj dege dhe dhe nga degë të tjera në rrethe ku influenca e ish-ministrave, ish-deputetëve dhe figurave të tjera të PD-së vijon të jetë prezente dhe e fortë, dolën dhe peticionet e famshme anti-Basha gjatë zgjedhjeve në parti.
Duket se as kritika e liderit historik Sali Berisha për Bashën dhe thirrja e tij për t’u bashkuar rreth tij për hir të partisë nuk ka pasur efekt në ortekun e lëvizjes, e cila pritet të marrë përpara këdo të pakënaqur në radhët e partisë më të madhe në opozitë. /tesheshi.com/
