LDK-ja e Isa Mustafës mohon të ketë ndonjë marrëveshje me PDK-në për bashkëpunim në disa komuna gjatë zgjedhjeve lokale, pas raportimeve për ekzistencën e një koalicioni të fshehtë në Prishtinë për të mposhtur Shpend Ahmetin.
Sipas LDK-së, bashkëpunimi me partinë e Kadri Veselit është vetëm një teori e rreme e lançuar nga ata që duan ta komprometojnë këtë parti.
“Sa herë që LDK-ja forcohet, oponentët tanë politikë shpikin histori të paqena, sikur ne kemi marrëveshje të fshehta me PDK-në për bashkëqeverisje”, thuhet në komunikatën e LDK-së.
LDK thekson se nuk është parti e klaneve dhe grupeve të interesit, por me traditë, që ka struktura të saj të fuqishme, vendimet e të cilave janë obligative për të gjithë ne.
“Këshilli i Përgjithshëm i LDK-së ka vendosur që në këtë mandat në asnjë rrethanë ne nuk hyjmë në bashkëqeverisje me PDK-në dhe këtë e kemi dëshmuar në Kuvendin e Kosovës.
I njoftojmë anëtarësinë e LDK-së dhe gjithë qytetarët e Kosovës, që të jenë të përgatitur dhe të mos bien pre e propagandës kundër LDK-së në ditët e ardhshme.
Këto propaganda tregojnë frikën dhe tmerrin që kanë ata nga vullneti i qytetarëve për ndryshim dhe për dënimin e atyre që e kanë kapur shtetin dhe e kanë mbytur perspektivën për të rinjtë tanë, sikurse edhe të atyre që shërbehen me dhunë dhe propagandë ekstreme.
LDK-ja është e vendosur të fitojë zgjedhjet lokale në shumicën e komunave të Kosovës dhe t’ia shkurtojë jetën qeverisë së pazareve dhe kontrabanduesve”, thuhet në reagimin e LDK-së. /tesheshi.com/
