Nga Blendi Gashi
LDK-ja e Isa Mustafës pas shumë konsultimesh dhe një gare të ashpër brenda partisë ka zgjedhur ish-ministrin e Punës dhe Mirëqenies Sociale Arban Abrashi, si kandidat për të sfiduar Shpend Ahmetin në Prishtinë dhe të rikthej në menaxhim bastionin e saj të dikurshëm.
Në garë të ngushtë kanë qenë tre kandidatë, Avdullah Hoti, Ismet Beqiri dhe Arban Abrashi.
Edhe pse nga votimi i fshehtë Hoti ka dalë kandidati më i votuar si kandidat për të sfiduar Ahmetin në zgjedhjet lokale të 22 tetorit, ai është tërhequr duke i lejuar Abrashit që të marrë nominimin.
Kështu përfundimisht është shuar dëshira e “sëmurë” e Ismet Beqirit që të garojë sërisht për karrigen e të parit të kryeqytetit.
Sa serioze është kandidatura e Abrashit?
LDK me kandidimin e Abrashit ka ofruar para prishtinasve një gjak të ri, një nga “brezat e rinj”, edhe pse jo një prishtinali siç është Shpend Ahmeti i Vetëvendosje-s.
Kjo zgjedhje e partisë së Mustafës pas Vjosa Osmanit e Avdullah Hotit mund të cilësohet më e mira pasi Abrashi në kohën sa ka ushtruar detyrën e ministrit të Punës ka fituar një reputacion pozitiv pasi nuk ka qenë ndër politikanët grindavec.
Hoti e Osmani mund të ishin kandidatë më serioz të LDK-së se Abrashi edhe për shkak të përkrahjes së madhe që kanë marrë në kryeqytet. i pari ka marrë fituar hiç më pak se 18 mijë e 674 vota të prishtinasve edhe pse ky numër i votave mund të ketë ardhur për shkak se ka qenë bartës i listës së LDK-së me aleatët, ndërsa e dyta 11 mijë e 294 vota të kryeqytetasve edhe pse ishte e renditur e 81-ta në listë.
Në dallim nga dy të lartpërmendurit, Abrashi në zgjedhjet e 11 qershorit në Prishtinë ka pasur një përkrahje solide që nëse krahasohet me votat e fituara me Shpend Ahmetin e bën një kandidat jo serioz.
Arbani i renditur i 77-ti në listën zgjedhore nga partia e tij, në Prishtinë ka fituar vetëm 2322 vota, diku dhjetë fish më pak vota se Shpend Ahmeti i cili ka marrë saktësisht 20 mijë e 901 vota, por që ka qenë i katërti në renditje.
Pra nëse shihen këto statistika, LDK-ja padyshim ka bërë një zgjedhje jo të duhur dhe vështirë se mund t´a rikthejë bastionin e saj me Abrashin, sidomos kur kihet parasysh se puna e Shpend Ahmetit vlerësohet jo pak nga prishtinasit.
Megjithatë do jenë qytetarët ata që më 22 tetor do thonë fjalën e tyre, ndërsa LDK-ja duhet të shpresoj të shkojë në balotazh dhe më pas të marrë përkrahjen e partive tjera që t’ia rrezikoj më pas seriozisht karrigen e kryekomunarit Shpend Ahmetit.
Kujtojmë se kandidat nga AAK-ja është ish-gazetari Arbër Vllahiu, ndërsa nga PDK-ja Lirak Çelaj. /tesheshi.com/
