Ambasada e Shteteve të Bashkuara të Amerikës në Shqipëri ka reaguar në lidhje me ngjarjen e sotshme në Lazarat, ku një efektiv i forcave RENEA humbi jetën dhe dy të tjerë ngelën të plagosur, gjatë një operacioni policor.
Ambasada amerikane shprehet se dënon me forcë çdo lloj dhune që drjetohet ndaj forcave ligjzbatuese.
“I shprehim ngushëllimet më të thella familjes së oficerit të policisë Ibrahim Basha, anëtar i Forcave Speciale Shqiptare, dy herë pjesëmarrës në misione me forcat e NATO-s në Afganistan, i cili u vra në Lazarat sot”,- thuhet në deklaratë.
Më tej shtohet: “Mendimet tona janë edhe me dy oficerët që u plagosën në krye të detyrës. Ambasada e SHBA mbështet plotësisht përpjekjet e ligjzbatuesve shqiptarë për të garantuar sigurinë e qytetarëve shqiptarë dhe bën thirrje që autorët e këtij krimi të tmerrshëm të ndiqen penalisht dhe të dënohen me të gjithë fuqinë e ligjit”. /tesheshi.com/
