Pak ditë pasi njoftoi largimin e tij nga Juventusi në fund të sezonit dhe pas 17 vitesh në klubin torinez, kapiteni Giorgio Chiellini luajti ndeshjen e fundit para tifozerisë vendase në një ndeshje kundër Lazios.
Pas 17 minutave simbolike, Chiellini, 37 vjeç, u zëvendësua nga holandezi Matthijs de Ligt, moment ku Giorgio mori duartrokitje nga i gjithë stadiumi i Torinos.
Me buzëqeshje, ai përshëndeti bashkëlojtarët e tij dhe ia besoi shiritin e kapitenit sulmuesit argjentinas Paulo Dybala, një tjetër lojtar që u tha lamtumirën tifozëve torinezë të hënën në mbrëmje para se të largohej në fund të sezonit. Ai më pas bëri një rreth nderi duke jua bërë me dorë tifozëve ndërsa ndeshja vazhdonte.
Në fanellën bardhezi të klubit nga Torino, Chiellini luan që nga viti 2005, duke fituar 19 trofe.
Në fanellën e kombëtares italiane, Chiellini luajti 116 herë dhe me të vitin e kaluar ishte kampion i Europës. Ai do t’i japë lamtumirën kombëtares më 1 qershor në ndeshjen kundër Argjentinës në Londër.
Chiellini ende nuk ka vendosur mes largimit përfundimisht nga futbolli apo nisjes së një aventure në moshën 37-vjeçare, me shumë gjasa në MLS amerikane.
“Juve ishte gjithçka për mua. Rinia, përvoja, pjekuria ime. Vullneti për të fituar, gëzimi i triumfit, pranimi i humbjes”, ka shkruar Chiellini në një postim në Instagram para ndeshjes së fundit në Torino.
“Nga sot do t’ju mungojë kjo skuadër, këto ngjyra, dhoma e zhveshjes. Ishe shembull, udhërrëfyes, vëlla, shok”, u përgjigj shoku i tij i skuadrës Leonardo Bonuçi, i cili do të jetë kapiten sezonin e ardhshëm. /tesheshi.com/
