Katër vite pasi la londinezët e Chelsea-t, dhe një vit pas tërheqjes përfundimtare nga futbolli i luajtur, ish-mesfushori i përfaqësueses angleze do të nisë aventurën e re, atë të një trajneri.
Frank Lampard ka fituar garën me dhjetëra rivalë të tjerë për të marrë drejtimin e Derby County-t, në detyrën e tij të parë si drejtues teknik i një ekipi.
Ai do të jetë trajneri i shtatë në tre vite për këtë skuadër, me një detyrë jo të lehtë përpara, siç e ka pohuar dhe vetë.
Një ekip i njohur, Derby County e përfundoi sezonin në Championship-in anglez në vend të gjashtë, ndërsa dështoi ndaj Fulham-it në play-off.
“Gjithmonë kam dashur të drejtoj një klub me një histori dhe traditë të madhe si Derby County, kështu që kjo është një goxha mundësi. E di se nuk do të jetë e lehtë…,” raporton BBC-ja të ketë thënë Lampard me marrjen e detyrës.
Ish-mesfushori ka patur një karrierë të suksesshme te Chelsea, ku ka fituar një varg trofesh, si në futbollin anglez dhe në atë europian. Një element kyç i kombëtares së Anglisë, ai ka luajtur 106 ndeshje për bluzën e vendit të tij, e ka shënuar 29 gola. /tesheshi.com/
