Portali i mirëinformuar me zhvillimet në Bruksel, që ndjek nga afër politikën europiane, Euroaktiv citon mediat serbe, por bën edhe analizën e vet, Greqia mund ta njohë Kosovën brenda vitit.
Bashkimi Evropian do të mirëpriste njohjen e Kosovës nga Greqia dhe zgjidhjen e të ashtuquajturës “mosmarrëveshje rreth emrit” me Maqedoninë, gjë e cila, sipas zyrtarëve evropianë, e pengon përparimin e këtij vendi drejt BE-së.
Analisti politik Dushan Janjiq është cituar të ketë thënë se njohja e Kosovës nga Greqia “do të arrijë qysh në vjeshtë të këtij viti”. Ai shprehet se “Tsipras do të luajë në mënyrë pragmatike”.
“Ai do ta njohë Kosovën për të vonuar zgjidhjen e çështjes së emrit të Maqedonisë. Për shkak të gjendjes së përkeqësuar në vend, ai nuk do të mund të zhvillojë politikat e tij. Ai do të duhet të bëjë lëshime, dhe, në këtë rast, kjo nënkupton njohjen e Kosovës”.
Portali pan-evropian “EurActiv” në këtë artikull rreth zhvillimeve më të fundit në raportet mes Republikës së Kosovës dhe Greqisë citon mediat serbe sipas të cilave njëri nga kushtet për marrjen e ndihmës financiare nga Perëndimi përfshin njohjen e Kosovës.
E përditshmja serbe “Blic” pohon se janë shfaqur indikacione të qarta se gjendja e rëndë financiare e Greqisë nënkupton se “Kosova përbën një betejë të humbur për Serbinë”.
Në artikull theksohet se shumica e vendeve anëtare të Bashkimit Evropian, me përjashtim Greqinë, Spanjën, Rumaninë, Qipron dhe Sllovakinë e kanë njohur pavarësinë e Kosovës.
Sipas burimeve të mediave serbe, “do të ishte një mrekulli që Greqia të mos e njohë Kosovën në muajt në vijim, e më së voni brenda një viti”.
“Nevojiten përpjekje serioze nga ana e diplomacisë serbe që Athina zyrtare të heqë dorë nga njohja e Kosovës, ose të paktën të shtyjë atë”, Blic citon një burim anonim. /tesheshi.com/
