Lajçak: Tre gjëra që priten nga Kosova dhe Serbia

I dërguari i posaçëm i Bashkimit Evropian për dialogun ndërmjet Serbisë dhe Kosovës, Miroslav Lajçak, tha se pritjet nga të dyja palët janë të qarta: deeskalim, zgjedhje të reja në veri dhe kthim në zbatimin e Marrëveshjes së Ohrit.

Siç ka thënë ai në Facebook, këtë ia ka bërë të ditur presidentit të Serbisë, Aleksandar Vuçiç dhe kryeministrit të Kosovës, Albin Kurti, në një takim në Bruksel.

Qëllimi i takimit me ta, ka thënë ai, ka qenë që të gjendet një rrugëdalje nga situata në veri të Kosovës “e cila është ende shumë e tensionuar”.

“Në emër të BE-së, pritshmëritë tona të qarta i kemi paraqitur të dyja palëve me fokus në tre elementë: deeskalim, zgjedhje të reja në veri dhe kthim në zbatimin e Marrëveshjes së Ohrit. Në ditët në vijim do të mbetemi në kontakt të ngushtë me të dyja palët dhe gjithashtu do të monitorojmë me kujdes zhvillimet në terren”, ka shkruar Lajçak në Facebook.

Biseda për Ballkanin Perëndimor në SHBA

Ai shtoi se javën e kaluar e filloi me një vizitë në Uashington, ku pati “bisedime produktive” për situatën në Ballkanin Perëndimor dhe përpjekjet e përbashkëta të BE-së dhe SHBA-së në këtë drejtim.

“Ishte shumë e rëndësishme të isha në SHBA dhe të krahasoja vëzhgimet me bashkëbiseduesit e mi në këtë kohë të ndjeshme”, shtoi ai.

Ai në Uashington ka biseduar për situatën në Kosovë me nënsekretaren amerikane Victoria Nuland dhe këshilltarin e sekretarit amerikan të shtetit, Derek Chollet.

“Ne theksuam rëndësinë e de-përshkallëzimit dhe kthimit në dialog me ndërmjetësimin e BE-së”, shkroi Lajçak.

Ai e diskutoi këtë edhe me të dërguarin special të SHBA-së për Ballkanin Perëndimor, Gabriel Escobar dhe një numër zyrtarësh të tjerë amerikanë. /tesheshi.com/