Italia fqinje po shfaqet si ngushëllim i yni përsa i përket kanabisit. Në një shkrim La Stampa-s thuhet se në vitin 2016 sipërfaqet e mbjella me hashash janë trefishuar nga veriu në jug të Italisë.
Gazeta i është referuar burime policore që raportojnë se në 2015-ën u zbuluan 139 mijë rrënjë, ndërsa këtë vit 405 mijë të tilla.
Plantacionet sipas të dhënave shtrihen më së shumti në Trapani, ndjekur nga Napoli, Sirakuza, Kalabria dhe Katanxaro.
Dhe më pas vjen ajo që e përkëdhel qeverinë e Ramës këndej detit: Sipas La Stampa-s, kultivimi në Itali është shtuar pas luftës që autoritetet shqiptare kanë ndërmarrë ndaj kultivimit të kanabisit që furnizon Europën.
Prej ditësh, politika shqiptare zjen nga deklarimet në lidhje me kanabisin.
Qeveria mbrohet me raportin më të fundit të Guarda Di Fiananza-s, sipas së cilit pjesa më e madhe e kanabisit të mbjellë është shkulur nga policia.
Por opozita bën përllogaritjet e saj dhe i del që sipërfaqet me kanabis të jenë pesëfishuar në 2016-ën. /tesheshi.com/
