Në fillim të seancës së sotme, Kuvendi i Kosovës mbajti një minutë heshtje në shenjë të nderimit për viktimat e Masakrës së Srebrenicës, e cila ndodhi njëzet vite më parë, gjatë Luftës së Bosnjës.
Në fjalën e tij kryetari i Kuvendit Kadri Veseli, theksoi se “20 vite më parë, në verën përvëluese të vitit 1995, në qytetin Srebrenica të Bosnjës, u bë krimi më i madh në Evropë, që pas përfundimit të Luftës së Dytë Botërore, e njohur si Masakra e Srebrenicës. Brenda dy ditësh, mbi 8000 burra u masakruan barbarisht nga njësitë ushtarake të gjeneralëve të Milosheviqit. Mijëra familje u shkatërruan përgjithmonë. Një qytet që datonte prej kohës romake u zhbë brenda pak orësh. Fjalët “genocid” e “spastrim etnik” sërish njollosën ndërgjegjen njerëzore. Bota u trondit”.
Më tutje ai shtoi se “krimi në Srebrenicë shfaqi natyrën e vërtetë të regjimit të Milosheviqit, që vetëm tre vite më vonë, me të njëjtën barbari, u rishfaq në fshatrat dhe qytetet e Kosovës. 20 vite pas krimit në Srebrenicë, e 16 vite pas krimeve të bëra në Prekaz, Izbicë, Suharekë, Mejë, Gjakovë, e vende të tjera të Kosovës, drejtësia nuk është përmbushur akoma. Është e domosdoshme që drejtësia të vihet në vend, sepse krimet e padënuara ndjellin kobe të reja”, ka theksuar Veseli.
