Kuvendi i Kosovës, në një seancë të jashtëzakonshme e në kushte po ashtu të pazakonshme, miratoi Projektligjin e Buxhetit të Kosovës për vitin 2016, ku 71 deputetë votuan pro, në sallën improvizuese, 1 votoi kundër, kurse 7 të tjerë nuk u deklaruan.
Deputetët e opozitës, (të Vetëvendosjes, AAK-së dhe Nisma për Kosovën) nuk ishin prezentë në sallë gjatë votimit.
Tre liderët e partive opozitare VV, AAK, NISMA në një konferencë të mbajtur për media e kanë quajtur jolegjitime seancën në sallën e improvizuar ashtu edhe vendimet që do të merren.
Kreu i VV-së, Visar Ymeri tha se mbledhja që mbahet në një skutë të Kuvendit as nuk është seancë as nuk është legjitime.
“Këto nuk janë seanca legjitime dhe vendimet që dalin janë jo legjitime. Ne i konsiderojmë si jolegjitime dhe secili vendim që del është ilegal”, tha Ymeri.
Kreu i AAK-së, Ramush Haradinaj, tha se qytetarët janë me deputetët e opozitës dhe se bëri të qartë se do të vazhdojnë të zbatojnë qëndrimin e tyre. Ai tha se mund të ulen në tavolinën e bisedimeve vetëm pasi Mustafa të tërheqë nënshkrimet.
“Ne i ftojmë të debatojmë me ta që t’i anulojnë këto marrëveshje dhe të kthehet normalitetit në vend”, tha Haradinaj.
Fatmir Limaj kryetar i NISMA-s tha se sot është përpjekja më serioze për të instaluar një shtet policor, dhe regjimin policor. “Largimi nga salla dhe më pas mbajtja e një takimi ilegal dhe urdhri për të larguar deputetët tregon më së miri këtë. Ne ftojmë qytetarët, analistët, njerëzit të vullnetit të mirë mos ta pranojnë instalimin e këtij shteti policor”, tha Limaj./tesheshi.com/
