Kuvendi i Kosovës: BE të hetojë rastet e abuzimit të stafit të EULEX-it

Kuvendi Kosovës ka miratuar Rezolutën e propozuar nga Lëvizja Vetëvendosje për misionin e Bashkimit Evropian për Sundim të Ligjit – EULEX. Votimi solli si rezultat 23 vota pro, 23 abstenime dhe 17 kundër.
Sipas tekstit të propozuar nga deputetja e Vetëvendosjes, Albulena Haxhiu me këtë Rezolutë Kuvendi i Republikës së Kosovës fton presidenten Atifete Jahjaga t’i kërkojë shefes së diplomacisë evropiane Frederica Mogherini, inicimin e hetimit institucional për çdo rast të cituar për stafin e EULEX-it në raportin që zyrtarë të BE-së kanë hartuar.
“Thërret në raportim të jashtëzakonshëm kryesuesin e Këshillit Gjyqësor të Kosovës dhe kryesuesin e Këshillit Prokurorial të Kosovës lidhur me aferat në lidhje me ndikimin e çështjeve hetimore të zyrtarëve të EULEX-it dhe marrjes arbitrare të kompetencave të organeve të drejtësisë nga ana e EULEX-it”, thuhet në pikën e dytë të Rezolutës.
Po ashtu, kërkohet që raportimi i kryesuesve të Këshillit Gjyqësor të Kosovës dhe Këshillit Prokurorial të Kosovës të bëhet dhjetë ditë nga miratimi i kësaj Rezolute./tesheshi.com/