Lulzim Basha sapo promovoi një platformë të re pas takimit me partitë aleate duke shpallur organin më të ri të “Republikës së Re”, që janë “Kuvendet Qytetare” nëpër qarqet e vendit.
“Në krye të këtyre kuvendeve janë zgjedhur përfaqësuesit më të spikatur të komuniteteve, për të garantuar një proces zgjedhor të lirë e të ndershëm”, thuhej në deklaratë.
Një vendim që në një farë mënyrë po legalizon një pushtet paralel të ri pas parlamentit të çadrës, qeverisë së çadrës dhe tani do të ngrejë “Këshillat Nacional-Çlirimtare” apo “Komitetet e Shpëtimit” që janë dy përvoja të njohura historike, njëra në Luftën e Dytë Botërore, kur u ngrit pushteti që i kundërvihej atij që legjitimohej nga italianët apo gjermanët (shih filmin “Këshilltarët”, ku u Murat Bënça zgjidhej nga populli); dhe në vitin 1997, kur në disa qytete të jugut, pasi ra shteti u ngritën disa organe për të mbushur vakumin e pushtetit apo për të treguar kundërshtimin me një pushtet të deligjitimuar, të quajtura “Komitetet e Shpëtimit”, të cilat PD-ja e kohës me të drejtë i kishte zët.
Dhe kjo është një shenjë e radhës që Lulzim Basha dhe PD bashkë me aleatët e saj gati po dalin nga sistemi kushtetues.
Por nga ana tjetër ofrohet një panoramë ku PD-ja jo vetëm është në sistem, por ka një ndikim jo të vogël brenda tij me pushtetin që posedon, dhe që, për paradoks, është pjesë e Republikës së Vjetër. Të saj janë: Presidenti i Republikës, Bujar Nishani, nën ombrellën e të cilit është kupola më e lartë e Drejtësisë – KLD-ja; është gjithashtu Kryeprokurori Adriatik Llalla; kreu i SHISH-it, e ca instanca të tjera pushteti që gati e bëjnë opozitën të jetë bashkëqeverisëse me të majtën.
Por kjo lloj dalje revolucionare jashtë sistemit, sidomos me ngritjen e strukturave që ngjajnë me garibaldinë, për të mos shkuar më tej në raste të ngjashme, ku vetëm komunistët dhe fashistët ngrinin armata dhe këshilla paralele, po e fut PD-në një kaos politik, e ne që e ndjekim politikën në një çmeritje për atë që po ndodh.
Në Itali, Lega Nord ka ngritur në veri “Rojet e gjelbëra” ndaj emigrantëve; dhe në Francë po ashtu e ka bërë dhe e djathta ekstreme e Le Penit. Por prej tyre edhe mund t’i presësh tabiate të tilla, pasi të tillë e kanë profilin, me “ta heq petllën” me aksionet politike kontraverse. Po PD-ja shqiptare pse po rrëshqet në të tilla përvoja të pakuptueshme nga racionaliteti politik?
Ajo e shpall çadrën si të lirisë, pa u kuptuar dot se përse zgjedh këtë cilësor, ku askush nuk po ankohet për mungesën e saj. Thotë se do sjellë “Republikën e Re”, por i gjithë lidershipi i saj, përfshirë dhe Bashën vetë, i përket së vjetrës. Tashmë shpall “Kuvendet Qytetare”, kur vetë dikur urrente “Komitetet e Shpëtimit”. Po jetojmë kohë suprizash që nuk të ngazellëjnë aspak…/tesheshi.com/
