Diplomacia e Uashingtonit ka gjetur një tjetër mënyrë origjinale për t’i imponuar opozitës shqiptare që të votojë reformën në Drejtësi, duke nisur sigurisht nga votimi i amendamenteve kushtetuese.
Ambasada amerikane në Tiranë ka ofruar një tjetër botim të Kushtetutës, nëpërmjet financimit të saj, si në formë ashtu dhe në përmbajtje, me variantet e përditësuara ta amendamenteve të reja.
Dhe kjo Kushtetutë e re, e cila i përgjigjet reformës në Drejtësi dhe që përbën një mesazh të qartë amerikan për ta votuar atë, u ka shkuar të gjithë deputetëve, posaçërisht atyre të opozitës, të cilët tashmë janë në provën më të vështirë të karrierës së tyre politike, nëse do t’i binden “Dajë Samit”, siç quhet ndryshe me këtë epitet Amerika, apo direktivës së palëkundur partiake, për të mos e votuar reformën pas shtuar paragrafin 88 të rekomandimeve të Venecias. Që opozita nuk lëviz nga istikami, e vërtetoi sot dhe ish-kryeministri Berisha në rolin e tij të kamufluar të një lideri të padiskutueshëm, të tipit de fakto, gjatë një fjalimi në parlament. /tesheshi.com/
