Ndër artistët firmëtarë të peticionit drejtuar presidentit Meta për ta dekretuar Ligjin për Teatrin, pra atij që i hap udhë ndërtimit të të riut aty ku sot është i vjetri, ishte dhe Leka Bungo.
Ish-aktor e regjisor i njohur, Leka Bungo është njëherësh një prej ish-zëdhënësave të Partisë Demokratike deri në ’97-ën. Ky fakt pak njihet për të njohurin e skenës shqiptare, që dikur, në anë të Teatrit Kombëtar, krijoi teatrin “Rubairat”. Jo shumë jetëgjatë, ai teatër do ishte një prej kujtimeve të bukura të viteve ‘2000, një “dallëndyshe” e inisiativave artistike për ta thyer monopolin e skenës tradicionale të TK.
Leka Bungo pra, do mbulonte për disa vite sektorin e komunikimit me publikun në PD, por pa shumë protagonizëm publik, edhe për faktin se qëlloi ta mbante si detyrë në kushte pushteti, periudhë ku zakonisht selitë e partive në qeverisje mbeten në hije.
I njohur si mik i ngushtë i Pëllumb Kullës, ku të dy së bashku punuan në Fier, njëri me me estradën e tjetri me teatrin, në kulmin që patën dy trupat e këtij qytetit në vitet ’80, ata siç iu bashkuan PD-së ashtu dhe u shkëputën prej sa pothuajse në të njëjtën kohë, duke qenë më pas dhe kritikë të saj.
Leka Bungo kryeson listën e emrave që duan teatër të ri, së bashku me Robert Ndrenikën, me të cilin ndajnë dhe ditët e moshës së tretë. Prej vitesh, Leka Bungo ka mbetur pothuajse në periferi të jetës artistike, edhe nga fakti se për disa vite jetoi në SHBA.
Rasti i tij si ish-zëdhënës partie, është unik në historinë politike të Shqipërisë, duke ardhur nga bota e aktrimit dhe e regjisurës. Precedent tjetër i ngjashëm është ish-zëdhënësja e Bashkisë në kohën e Lulzim Bashës, Anila Bisha, aktore e njohur dhe bashkëshorte e ish-deputetit të PD-së, Besnik Bisha, i njohur si regjisor. /tesheshi.com/
