Nga Mensur Krasniqi
Këshillit Mbipartiak të inicuar nga Lëvizja “BESA” çdo ditë e më shumë po i bashkangjiten figura të ndryshme publike, mirëpo ende mbetet dilema se kush do t’i prijë si udhëheqës këtij Këshilli. Zëdhënësi i Lëvizjes “BESA” është shprehur nuk ka përjashtuar mundësinë që si kryetar i Këshillit Mbipartiak të jetë analisti Kim Mehmeti, Abdylmenaf Bexheti, Arsim Zekolli apo ndonjë tjetër me ndikim në shoqëri.
Sipas Afrim Gashit, qëllimi i këtij Këshilli është që të bashkojë të gjithë shqiptarët e Maqedonisë me një figurë emblemetike e cila nuk mund të kontrollohet nga asnjë parti politike.
“Ka shanse të jetë Kim Mehmeti, Abdylmenaf Bexheti, Arsim Zekolli dhe të tjerë. Ideja e këtij Këshilli është që të bashkojnë popullatën shqiptare, ndërsa udhëheqësi i Këshillit të jetë figurë publike me peshë të madhe që nuk mund të kontrollohet nga asnjë parti politike. Qëllimi i këtij Këshilli mbipartiak është që të bashkohen sa më shumë parti, akademikë, profesorë, artistë dhe intelektualë të fushave të ndryshme të cilët do të largonin nga skena politike dy partitë shqiptare, BDI dhe PDSH”, ka deklaruar për Zhurnal, Afrim Gashi nga Lëvizja “BESA”.
Ndërkaq, kreu i Lëvizjes për Reforma në PDSH, Zijadin Sela nuk sheh kurrfarë mundësie që dikush nga jashtë të udhëheqë me opozitën derisa opozita ka udhëheqësit e saj.
“Nuk ia marrim të drejtën askuj të jetë lider, por lider bëhesh me të drejtë përfaqësimi që meret përmes votës, dhe në fakt kjo është demokracia në vetvete. Opinionistët dhe analistët përfqësojnë mendimet e tyre dhe nuk mbajnë përgjegjësi politike para publikut. Kjo përgjejësi mbahet në momentin kur bëhesh lider me vota. Me sa e kam kuptuar, Kim Mehmeti ka shprehur publikisht simpati për Lëvizjen BESA dhe meqë deri më tani BESA ende nuk ka mbajtur kongres, ky mund të jetë shansi që ai të zgjidhet aty lider dhe në këtë mënyrë mund të jetë i barabartë në frontin opozitar në kuadër të Alenacës për Shqiptarët. Ndryshe nuk shoh kurrfarë mundësie që dikush nga jashtë, ose nga lartë të vendoset në krye të opozitës, aq më tepër kur opozita shqiptare tani për tani i ka udhëheqësit e saj dhe ata vendosin si do të kordinohen punët në mes veti”, deklaroi Zijadin Sela, i cili ka shprehur habi se si është e mundur të flet dikush në emër të opozitës shqiptare, së paku në emër të subjektit të tij dhe të RDK-së. /tesheshi.com/
