Autoritetet e Kosovës mbyllën institucionet paralele të Republikës së Serbisë në Mitrovicë, Zveçan, Zubin Potok dhe Leposaviq.
Ministri i Administratës deklaroi se puna e tyre është në kundërshtim me ligjet e Kosovës. E nga ana tjetër, është shtuar prania e forcave të KFOR-it në urën e Ibrit.
Ndihmës Sekretari Amerikan i Shtetit për Çështjet Evropiane dhe Euroaziatike, James O’Brien ka deklaruar se SHBA-të janë të shqetësuara për ato që ai thotë se janë lëvizje të pakoordinuara dhe provokuese të autoriteteve të Kosovës.
“I bëjmë thirrje kryeministrit Kurti dhe qeverisë së tij që të konsultohen dhe koordinohen me bashkësinë ndërkombëtare dhe të ndalojnë lëvizjet e pakoordinuara që mund të ndikojnë negativisht në partneritetin tonë”, ka shkruar O’Brien në rrjetin social X.
Mungesa e bashkëpunimit
Në Bashkimin Evropian shprehen të zhgënjyer nga mungesa e bashkëpunimit të forcave të sigurisë së Kosovës me partnerët ndërkombëtarë.
“BE-ja dëshiron të përsërisë se operacioni aktual i policisë, që synon zyrat e mbështetura nga Serbia, mund të çojë në një përshkallëzim shtesë të një situate tashmë të paqëndrueshme. Çështja e zyrave të mbështetura nga Serbia duhet të trajtohet dhe të zgjidhet përmes dialogut me ndërmjetësimin e BE-së”, tha zëdhënësi Peter Stano.
Presidenti i Serbisë, Aleksandar Vuçiç, ka kërkuar nga përfaqësuesi special i Bashkimit Evropian për dialogun ndërmjet Serbisë dhe Kosovës, Miroslav Lajçak, reagim konkret të Unionit për veprimet e autoriteteve të Kosovës.
Ai shprehu shqetësimin e tij për, siç thotë, dhunën në Kosovë dhe kërcënimin e sigurisë së popullatës serbe nga lëvizjet arrogante dhe ilegale të Prishtinës. E megjthatë, ky është një spekullim i trashë i Vuçiçit. Eshtë e qartë se Kurti po synon të prish statukuonë e ndërkombëtarëve karshi Kosovës, të cilët i kanë lënë shumë procese në zvarritje, duke ia vështirësuar shumë funksionimin si shtet i pavarur nga një Serbi që synon pikërisht këtë gjë. /tesheshi.com/
