Ish-lideri i Lëvizjes Vetëvendosje, Albin Kurti ka deklarua sot se Kosova ka nevojë për një republikë të re, të cilën ai e ka quajtur, “Republika e Tretë”. Kurti është shprehur se “Republika e Dytë” në vend që të përkrahë qytetarët dhe të punojë për ta, u ka treguar çizmen dhe shqelmin qytetarëve të saj.
“Më 17 shkurt 2008 u shpall pavarësia e Kosovës. Sot, më qartë se kurrë e ndjejmë se kjo ishte Republikë për shitje. Edhe kjo Republikë kishte dy fytyra: sipërmarrësin, Behgjet Pacolli dhe ndërmarrësin, Ramiz Kelmendi. Në këtë “Republikën e Dytë” qytetarët kanë parë çizmen dhe shqelmin e shtetit e nuk kanë parë dorën e ndihmën e tij. Ne kemi nevojë për një “Republikë të Tretë”, për një Republikë të zhvillimit”, ka deklaruar Kurti në forumin “Fol hapur” të organizuar nga Lëvizja “Fol”.
Më tej, ish kreu i VV ka shtuar se ndryshimi mund të ndodhë vetëm me ardhjen në pushtet të Lëvizjes Vetëvendosje si parti e majtë.
Sipas Kurtit, në 15 vjet populli i Kosovës ka provuar qeveritë e djathta dhe tani po detyrohet të ikë nga vendi ose të protestojë kundër qeverisë. Ai ka hedhur idenë se duhet provuar socialdemokracia dhe një qeveri e majtë.
“Republika e Tretë bëhet përmes socialdemokracisë, bëhet nëpërmjet shtetit Republikan, ku shteti zhvillimor, ai i së drejtës dhe ai social lidhen me njëri tjetrin”, u shpreh Kurti.
