Kryeministri Kurti mori pjesë në forumin me temë “Thellimi i Solidaritetit: Si mundet Evropa të dalë më e fuqishme nga trazirat aktuale gjeopolitike?”, që po organizohet nga The Economist në Greqi, nga ku shkoi aty ku Kosova ka ndjeshmërinë më të madhe, te veriu.
“Ne duhet të bashkohemi, si forca që kundërshton elementet destabilizuese që përbëjnë një kërcënim të madh për demokracinë”, deklaroi Kurti, referuar ngjarjeve në Banjskë.
Sipas tij, veriu është shfrytëzuar nga serbët si qendër për trafikun e drogës, kontrabandën e armëve dhe minierat e kriptomonedhave.
“Këto aktivitete bien ndesh drejtpërdrejt me sundimin e ligjit dhe vlerat demokratike që përfaqëson Kosova. Marrëdhënia mes Kosovës dhe Serbisë mund të karakterizohet më së miri si një vend, Kosova, që punon për të ndërtuar veten për herë të parë, duke u përpjekur për sukses të vërtetë demokratik, ndërsa një vend joliberal përpiqet ta mbysë këtë progres, duke përdorur taktika të përdorura shpesh nga figura si Putini”, theksoi i pari i qeverisjes kosovare.
Kurti edhe njëherë potencoi versionin e autorësisë së Beogradit në ngjarjen e Banjskës.
“Më 24 shtator, një muaj më parë, agresioni që kemi parë kulmoi kur trupat e armatosur paraushtarake që ishin trajnuar në bazat zyrtare ushtarake në Serbi hynë në vendin tim dhe hapën zjarr ndaj forcave të policisë, duke vrarë një nga policët tanë. Në të njëjtën kohë, Serbia u angazhua në atë që SHBA e përshkruan si një ngritje ushtarake ‘të paprecedentë’ përgjatë kufirit tonë. Në ditët që pasuan, një sasi e konsiderueshme provash tregonin përfshirjen dhe planifikimin e një pushtimi më të madh nga vetë shteti”, tha Kurti nga territori i një shteti që nuk e njeh Kosovën, si dhe afër Serbisë karshi shqiptarëve në histori. /tesheshi.com/
