Kryeministri i Kosovës, Albin Kurti, ka thënë se është i gatshëm të takohet me presidentin e Serbisë, Aleksandar Vuçiç, por vetëm për të diskutuar propozimin franko-gjerman.
“Ky takim mund të mbahet në kuadër të propozimit franko-gjerman. Jam gati të ulem dhe të bisedoj”, tha ai në një intervistë për Euronews Albania.
Ai vlerësoi se plani franko-gjerman, të cilin edhe Bashkimi Evropian e mbështeti si kornizë negociuese, “është një bazë e mirë për diskutime të mëtejshme dhe një platformë solide për përparim”.
Ai shtoi se marrëveshja për atë propozim nuk mund të arrihet pa një raund të ri negociatash dhe se nuk është marrëveshje përfundimtare.
Një njohje e rëndësishme e pesë anëtarëve të BE-së
Kurti tha se është optimist kur është fjala për arritjen e marrëveshjes, sepse është shtuar insistimi ndërkombëtar, por në të njëjtën kohë në Beograd e kanë kuptuar se “nuk mund të pajtohen me mua në dëm të Kosovës”.
Ai ka përsëritur qëndrimin e autoriteteve të Kosovës se në qendër të marrëveshjes për normalizimin e marrëdhënieve duhet të jetë “njohja reciproke”.
Ai thotë se njohja de facto është shumë e rëndësishme, por se njohja de jure është po aq e rëndësishme.
“Ne besojmë se njohja e pesë vendeve të BE-së që ende nuk e kanë njohur Kosovën është shumë e rëndësishme. Pra, nëse nuk mund të kemi një vend në Kombet e Bashkuara, siç morën dy Gjermanitë, duhet të bëjmë çmos që të kemi në krah Spanjën, Sllovakinë, Greqinë, Rumaninë dhe Qipron. Është bërë e pakuptimtë që pesë nga 27 vendet e BE-së dhe katër anëtarë të NATO-s nuk na njohin as 15 vjet pas shpalljes së pavarësisë”, tha Kurti.
Zgjidhja e çështjes së pakicave kombëtare
Kur është fjala për Bashkësinë e Komunave Serbe (ZSO-Asocacioni), ai ka përsëritur se nuk e ka kaluar “testin” e Gjykatës Kushtetuese të Kosovës dhe se është e vetmja nga 33 marrëveshjet e nënshkruara në Bruksel që është anuluar në gjykatë.
Kurti pretendon se Serbia nuk i ka përmbushur dy të tretat e atyre marrëveshjeve.
Sipas tij, ky nuk është problemi kryesor, por së pari duhet të zgjidhet çështja e pakicave kombëtare në “vendet tona”.
Edhe një herë ai shprehu qëndrimin se nëse Serbia kërkon Asocacionin në Kosovë, e njëjta gjë duhet të zbatohet edhe për minoritetin shqiptar në Serbi. /tesheshi.com/
