Hapja e paralajmëruar e urës mbi Ibër në Mitrovicë nuk është e drejtuar kundër askujt, veçanërisht kundër partnerëve të Kosovës, tha kryeministri i Kosovës Albin Kurti, duke folur për urën që ndan Mitrovicën jugore dhe veriore, por edhe për serbët dhe shqiptarët.
Në dy dekadat e fundit, ajo urë është bërë simbol jo vetëm i ndarjes, por edhe i konfliktit mes popullatës serbe dhe asaj shqiptare. Marrëveshja e Brukselit për lirinë e lëvizjes parasheh hapjen e urës për qarkullim. Vendimi për këtë është marrë një vit më parë nga Kuvendi Komunal i Mitrovicës, por barrikadat janë ende në urë. Hapja e urës tashmë është kundërshtuar nga përfaqësuesit politikë të serbëve, përfaqësuesit e Bashkimit Evropian, të vendeve të Quinti-t dhe të KFOR-it, duke konsideruar se ura ende është zonë rreziku.
“Urat duhet të jenë të hapura”
“Kosova është një vend normal dhe urat e saj duhet të jenë të hapura”, tha Kurti në seancën e qeverisë së Kosovës të mërkurën.
Ai tha se hapjen e urës që ndan pjesën veriore nga ajo jugore të Mitrovicës e konsideron “hap të drejtë, të nevojshëm dhe të dobishëm për të gjithë”.
“Ne i mirëpresim raportet preliminare për vlerësimin e stabilitetit të urës që i kemi ndarë menjëherë me komandantin e KFOR-it dje në frymën e konsultimit dhe koordinimit të vazhdueshëm që kemi”, tha Kurti.
Ai ka bërë të ditur se do të vazhdojë konsultimet dhe koordinimet me partnerët kosovarë për hapjen e urës mbi Ibër.
“Qeveria e Kosovës dhe unë si kryeministër besojmë thellë se liria e lëvizjes dhe sundimi i ligjit nga njëra anë dhe paqja dhe siguria në anën tjetër, janë të mundshme së bashku dhe kjo është rruga e drejtë për vendin, shoqërinë dhe shtetin tonë. Ne do të vazhdojmë konsultimin dhe koordinimin me partnerët tanë”, tha Kurti.
Pavarësisht njoftimeve për hapjen e urës, as Kurti dhe as zyrtarë të tjerë kosovarë nuk përmendën një datë se kur mund të ndodhë.
Në kuadër të “fushatës gjithëpërfshirëse për përfitimet dhe synimet” e hapjes së urës, u iniciuan edhe diskutime me qytetarë dhe shoqata. /tesheshi.com/
