Kurthi erotik: dënimi i diskutueshëm i një ish-kryebashkiaku

Safet Gjici, ish-kryebashkiak i Kukësit, u dënua me tri vite burg për shpërdorim detyre, lidhur me rastin e një akti erotik në zyrë. Ndërsa ajo që i ofroi lojë erotike si një kurth, Alma Kaçi, u dënua me një vit burg, duke u shpallur fajtore për prostitucion.

Para shpalljes së vendimit, ish-kryebashkiaku i Kukësit kërkoi pafajësi, duke pretenduar se nuk ka shkelur asnjë ligj, ndërsa i përlotur i kërkoi falje familjes dhe qytetarëve të Kukësit.

“Unë kam marrë dënimin më të madh, dënimin moral. U kërkoj falje familjarëve të mi dhe qytetarëve të Kukësit”, tha Gjici.

Dhe për të gjithë atë që ndodhi, rënien e tij në kurth, ai fajësoi një emër, Abedin Oruçi.  “Përplasja ime me Abedin Oruçin ka nisur që në vitin 2019 kur unë, në cilësinë e Kryetarit të Bashkisë, i hoqa atij rrethimin me kangjella hekuri të sheshit para bashkisë, sepse nuk ishte pronë e tij. Këte gjë e provova në bazë të dokumenteve në Kadastër që ajo toke nuk ishte e Abedin Oruçit. Bëhet fjalë për 9,3 dynym tokë. Po ashtu unë nuk kam lejuar që Abedin Oruçi të ndërtojë një objekt pa leje në afërsi të liqenit të Kukësit. Po ashtu me Oruçin kam pasur edhe përplasje fizike ditën që ka qenë në Kukës ambasadorja holandeze. Kam bërë kallëzim për të, pesë akuza në ngarkim të tij por ka arritur t’i pushojë”, tha Gjici.

Megjithatë, ky kontekst nuk është marrë parasysh në hetime. Gjici ëstë gjykuar ngushtësisht për aktin e tij në zyrën e shtetit, gjithsesi pa u provuar ndonjë aferë korruptive nga ana e ish-kryebashkiakut.

Ajo që pritej dhe duhej do ishte një hetim për shantazh, gjë që nuk ka ndodhur. /tesheshi.com/