Politikanët e Kosovës kanë uruar të gjithë besimtarët myslimanë me rastin e festës së Kurban Bajramit, në begati dhe në harmoni, të festojnë me familjarët, miqtë dhe me më të dashurit e tyre.
Presidentja, kryeministri dhe liderët e partive politike, urojnë që të vazhdohet kultivimi i traditës e tolerancës dhe të respektit për qytetarët tanë të besimeve dhe kulturave të ndryshme, si një ndër vlerat më të çmuara të shoqërisë sonë.
Urimi i presidentes Atifete Jahjaga
“I nderuari Myfti Tërnava, Juve, të gjithë besimtarëve myslimanë dhe të gjithë qytetarëve të Republikës së Kosovës, ju uroj Kurban Bajramin, këtë festë të mirëkuptimit, harmonisë në familje dhe shtrirjes së dorës së solidaritetit ndërmjet njerëzve.
Në këtë ditë të veçantë, uroj që të gjithë besimtarët myslimanë, në begati dhe në harmoni, të festojnë me familjarët, miqtë dhe me më të dashurit e tyre. Uroj që në secilën familje të ketë shëndet, mirëqenie dhe gëzim.
Të shtrijmë dorën e ndihmës dhe të solidaritetit për të gjithë ata që kanë nevojë dhe me krenari të vazhdojmë ta kultivojmë traditën e tolerancës dhe të respektit për qytetarët tanë të besimeve dhe kulturave të ndryshme, si një ndër vlerat me të çmuara të shoqërisë sonë.
Republika e Kosovës është përcaktuar për ndërtimin e të ardhmes euroatlantike, si pjesë e familjes së shteteve të lira dhe demokratike ku respektohen të drejtat dhe liritë e secilit qytetarë pa dallim. Kjo festë e Kurban Bajramit, të na shërbejë si një mundësi për të reflektuar për punën dhe sukseset që kemi arritur si individë dhe si shoqëri në realizimin e këtij synimi. Sot me respekt të veçantë, t’i kujtojmë të gjithë ata që u angazhuan dhe sakrifikuan që ne sot të jemi pjesë e popujve të lirë. Me fat Kurban Bajrami!”.
Urimi i kryeministrit Isa Mustafa
“Festa e Kurban Bajramit, ashtu si festat e tjera fetare, na bashkon në familje, na bashkon me farefisin, na bashkon me miqtë tanë.
Uroj që edhe kjo festë të jetë festë e unitetit, e arsyes, që ne bashkërisht të zgjidhim problemet e këtij vendi, ta ndërtojmë Kosovën vend të mirëqenies, vend të zhvillimit dhe vend ku çdo qytetar do ta ndjente veten mirë.
Dëshiroj që të gjithë njerëzit në Kosovë dhe më gjerë, ta ndjejnë veten mirë në këtë festë që simbolizon sakrificën, solidaritetin, tolerancën dhe besimin”.
Urimi i Hashim Thaçit, kryetar i PDK-skryetar i PDK-së dhe ministër i Jashtëm
“Urime festa e Kurban Bajramit të gjithë besimtarëve myslimanë. Sakrifica, vetëmohimi, uniteti dhe harmonia familjare uroj të na përcjellin edhe përtej kësaj dite”.
Urimi i liderit të AAK-së, Ramush Haradinaj
“Gjithmonë ka një ditë, kur besimtarët ndjehen më afër njëri tjetrit dhe më afër krijuesit të tyre. E tillë është edhe dita e sakrificës, që ndryshe njihet si festa Kurban Bajramit. Kjo festë është e madhe për besimtarët muslimanë në gjithë Botën, por ndër shqiptarët në momente si këto, ka fuqi edhe më të madhe.
Sakrifica për të mirën e përgjithshmë, është pjësë e qeniës sonë, prandaj në këtë Kurban Bajram, t’i kujtojmë edhe një herë, të gjithë ata që me sakrificën e solidaritetin e tyre, bënë që të jemi të lirë edhe në manifestimin e besimt tonë.
Me dëshirën për mirëqenie, urimin për paqe dhe gëzimin në familjet tuaja, le ta kremtojmë këtë Kurban Bajram, edhe në shënjë solidariteti e uniteti për të mirën e shtetit tone”.
Urimi i kryetarit të NISMA-s, Fatmir Limaj
“Miq të dashur, jemi në prag të festës së Kurban Bajramit. Gjithë qytetarëve të Kosovës, të besimit islam, përzemërsisht ju uroj këtë festë. Mirësia, solidariteti dhe paqja të jenë përcjellëse e motivuese për një jetë më të mirë për të gjithë ju dhe familjet tuaja”. /tesheshi.com/
