Nga Blendi Gashi
Kryministri i Kosovës, Isa Mustafa, vazhdon të bëj deklarata skandaloze sikur të mos ketë njerëz që e këshillojnë.
Edhe pse ka një numër të madh të këshilltarëve pranë, siç duket Mustafa fare nuk i dëgjon ata, e në veçanti këshilltarët që kanë të bëjnë me komunikim me publikun.
Çështja e Demarkacionit që po vazhdon të kundërshtohet fuqishëm nga partite opozitare, ekspertët e fushës dhe deputetë të partisë së tij LDK-së, kanë bërë që Mustafa të tregoj edhe një herë anën e tij të “errët”, atë të fyerjes në mënyrën më të ultë ndaj kundërshtarëve, kushdo qofshin ata.
Mustafa, përmes një shkrimi që publikoi sot në profilin e tij në Facebook më së shumti ka goditur ekspertët që po kundërshtojnë shenjëzimin e kufirit me Malin e Zi, pra veçanërisht Shpejtim Bulliqin që është njëherit deputet i partisë së tij, edhe pse nuk e ka cekur me emër.
Kreu i LDK-së, Mustafa, njwherwsh kryeministwr, me këtë deklaratë dëshmon qartë se ai fare nuk heziton të fyejë, pra t’i quaj mashtrues, profiter dhe persona që kanë nevojë të kontrollohen nga mjeku, edhe anëtarët e partisë së tij, vetëm për të mbrojtur vetën, duke treguar se nuk është një lider partiak unifikues, por përçarës që nuk e çanë kokën se kjo deklaratë mund të prek një numër të përkrahësve të partisë së tij të cilët e votuan për deputet Shpejtim Bulliqin.
Deklarata skandaloze e Isës: “Ekspertët-profesorët”, të kontrollohen te mjeku
Kreu i LDK-së pa kurrfarë marre ka bërë një deklaratë skandaloze duke thënë se ekspertët që po diskutojnë për çështjen e Demarkacionit, dhe po thonë se dokumentet e serbëve janë më të sakta se të shqiptarëve, duhet të kontrollohen te mjeku.
“Ekspertët-profesorët”, të cilët thonë se dokumentet e serbeve janë më të sakta se ato të shqiptarëve, vështirë se mund të na bindin se kjo është e vërtetë. Po të ishte e vërtetë kjo, Kosovë do ta kishte ndjerë veten më mirë dhe më sigurt me Serbinë sesa e pavarur. Para se të japin të tilla deklarata, ata meritojnë të kontrollohen te mjeku, qoftë në sektorin publik apo privat. Këto shërbime ua ofron shteti.
Kur futesh në kurthin e kauzave të rrejshme politike dhe dëshiron që ato kauza ti argumentosh “shkencërisht”, atëherë shkencës i hyn fort në hak. Soji i këtyre “shkencëtarëve-profesorëve” dhe i atyre që kanë blerë prona me pak pare atje ku dëshirojnë ta qojnë kufirin dhe të pamundësojnë lëvizjen e lirë për ata që nuk kanë para të shëtitën me jahte por kanë nevojë të shijojnë liritë themelore që u takojnë, nuk meriton përkrahje. Kuvendarët tanë marrin vendime me mendje racionale. Ata mund të jenë emocional, por nuk duhet të mashtrohen nga diletantët dhe profiterët”, është një pjesë e deklaratës ku Mustafa fyen rëndë ekspertët që po kundërshtojnë Demarkacionin, Shpejtim Bulliqin e Florim Isufin dhe të tjerë.
Bulliqi: Isa Mustafa po i frikësohet fakteve të një pushteti që i ka shërbyer me tërë energjinë e tij
Fyerjet që ka bërë lideri i LDK-së, aspak nuk i kanë pëlqyer deputetit të kësaj partie, Shpejtim Bulliqi i cili shprehet i habitur me fjalorin e përdorur nga kreu i partisë së tij.
“Po jo kjo është më shumë se për të ardhur keq aq më tepër kur del nga goja e një ‘akademiku’ dhe nga një kryeministër vendi i cili po ju frikësohet fakteve të atij pushteti që gjatë kohës i ka shërbyer me tërë energjinë e tij”, ka thënë Bulliqi, për tesheshi.com.
Ndryshe, pas fyerjeve të bëra nga kryeministri Mustafa, eksperti Florim Isufi së bashku me Shpejtim Bulliqin kanë lëshuar edhe një reagim të përbashkët, duke i konsideruar deklaratat e kreut të qeverisë si fyerje.
“Falënderojmë kryeministrin e shtetit Z. Mustafa që me kujdes të shtuar po përcjell debatet shkencore në lidhje me demarkacioni (SHVK) e kufiri Kosovë – Mali i Zi. Edhe pse akademik dhe me një përvojë të gjatë universitare e me njohuri të paskajshme të procesit të zhvillimit të Universitetit të Prishtinës “Hasan Prishtina” që nga viti 1970, si për nga përgatitja e kuadrove ashtu edhe për nga infrastruktura fizike dhe ligjore është e pakuptueshme si i lejon vetes të nxjerrë nga konteksti pjesëza të fjalisë për t’i fyer kolegët e tij, dhe atë për interesa personale pa u bazuar në fakte shkencore”, thuhet në reagimin e dy ekspertëve. /tesheshi.com/
