Daniel Kimura kapi titujt e lajmeve këtë javë për shkak të komenteve të tij të tharta ndaj turistëve që u ankuan se ushqimi në një tempull-bujtinë ishte për në plehra.
Prifti budist i bëri komentet në reagim të vërejtjeve negative për hotelin të cilat u bënë virale në internet, ndërkohë që ai kritikoi turistët se nuk kishin bërë detyrat e shtëpisë përpara se të vizitonin tempujt japonezë.
Bujtina “Sekishoin Shukubo” u ofron turistëve mundësinë të qëndrojnë në një tempull antik budist në malin Kōya, vendndodhje e listuar në trashëgiminë botërore, në jug të Osakës. Por disa klientë morën më shumë sesa paguan kur ata lanë komente kritike në booking.com.
Pas ankesës së një vizitori ushqimet “e pakta dhe vegjetariane” dhe mungesë shpjegimesh për traditat e tempullit, përgjigja “zyrtare” ishte se tempulli ishte një vend trajnimi dhe perëndimorët nuk do të merrnin trajtim special, duke shtuar: “Nëse jeni kaq të interesuar në jetën e një murgu, atëherë ju duhet të rruani kokën dhe të bëheni një prej tyre”.
Në një tjetër shkëmbim replikash, një klient tha se nuk kishte ngrohje jashtë dhomës së gjumit dhe ushqimet “e çuditshme” nuk ngjanin me “asnjë ushqim që kanë provuar ndonjëherë, duke nxitur përgjigjen: “Po, është kuzhina e manastireve japoneze, ti torollak i paedukuar”.
30-vjeçari Daniel Kimura, prift zyrtar i Shingonit i cili është lindur në Shtetet e Bashkuara, por ka jetuar në Japoni prej 15 vjetësh, mori autorësinë e përgjigjeve negative.
Në një intervistë me The Guardian, Kimura tha se ai ishte penduar shumë për sharjet që kishte bërë në përgjigjet e veta dhe u zotua të ulte tonet në komentet e tij në të ardhmen. Por, ai tha gjithashtu se ishte frustruar nga përballja e vazhdueshme me turistë të cilët postojnë “reagime arrogante sikur të jenë ndoca udhëtarë pionierë”.
Kimura tha se rajoni i malit Kōya – historikisht një destinacion popullor për pelegrinazhe fetare – ka përjetuar një fluks të madh me turistë perëndimorë që nga listomi në Trashëgiminë Botërore në vitin 2004.
“Sigurisht, ata nuk flasin as edhe një fjalë japonisht dhe ata vijnë këtu duke pritur që çdo gjë t’u jepet në dorë mbi një pjatë, dhe mua më vjen t’u them, duhet të dini konnichiëa (përshëndetje) dhe ohayō gozaimasu (mirëmëngjes) – vetëm pak fare”, tha Kimura.
“Humbet durimin, madje edhe për një murg apo prift. Më duhet të punoj me këtë problem”.
Disa turistë, shtoi ai, “vijnë këtu me pritshmërinë e një hoteli me gjashtë yje dhe kjo është tërësisht gabim”.
“Përpiqem t’u shpjegoj se nuk mund të presin luks kur vijnë në një vendndodhje manastiri dhe sigurisht që do të ketë një përvojë të zhveshur nga komoditetet”, tha Kimura.
Pasi një gazetar kanadez postoi foto të këtyre komenteve në Tëitter gjatë javës, replikat e tharta janë ripostuar më shumë se 15 mijë herë dhe janë pëlqyer nga 35 mijë përdorues. Përgjigjet origjinale që prej kësaj kohe janë hequr edhe në booking.com, që thuhet se i ka kërkuar tempullit të mos ofendojë klientët.
Përgatiti: Juli Prifti- /tesheshi.com/
