Mes një situate aspak normale, kur një numër vendesh europiane kanë marrë një qëndrim tendencioz ndaj fushatës për referendumin në Turqi mbi ndryshimet kushtetuese, duke i penguar aktivitetet në favor të këtyre ndryshimeve e duke u dhënë hapësirë atyre kundër tyre, presidenti turk, Rexhep Tajjip Erdogan, ka patur mbrëmë një dalje të gjatë të drejtpërdrejtë televizive.
Në intervistën për dy kanale televizive mjaft të njohura në Turqi, Erdogan ka folur sigurisht dhe për atë çka po ngjet këto ditë në një numër vendesh të BE-së, me takimet e anuluara e në anulim të ministrave dhe politikanëve turq me bashkatdhetarët e tyre.
Erdogani i ka akuzuar këto vende europiane se po punojnë kundër fushatës për “po”-në në kuadër të referendumit të mesit të prillit.
“Një pjesë e vendeve të Bashkimit Europian nuk po e përtypin dot fatkeqësisht këtë ngritje të Turqisë, ama në radhë të parë është Gjermania. Ajo po i jep në mënyrë të pamëshirshme mbështetje terrorit,” u deklaroi presidenti turk gazetarëve në këtë intervistë.
“Këta po tregojnë fytyrën e vërtetë të Perëndimit,” theksoi Erdogani, i njohur për fjalët e drejtpërdrejta.
“Kancelarja e Gjermanisë po vihet në krah të Holandës. Turp të të vijë!”, qe reagimi i tij për Merkelin.
Ai i akuzoi si Gjermaninë dhe Holandën për shpërfillje të Konventës së Vjenës, e për praktika naziste në sjellje.
“Ne mund ta quajmë këtë neonazizëm!”
Presidenti turk u shpreh se nuk do të ishte i kënaqur me vetëm një ndjesë nga Holanda për ngjarjet e fundjavës.
“Ata shpejt a vonë kanë për të paguar çmimin për këtë,” do të thoshte ai në intervistën e gjatë, ku në vëmendje qenë dhe një sërë çështjesh të tjera, vendore e në nivel më të gjerë. /tesheshi.com/
