NATO do t’u thotë komandantëve të saj ushtarakë sot që të hartojnë plane të reja për mbrojtjen nga Rusia, tashmë me realitetin e ri të pushtimit të Ukrainës.
Plane të tilla do të përfshijnë më shumë trupa dhe mbrojtje raketore në Evropën Lindore, raportoi Reuters.
Qëllimi i planeve të reja është ngritja e gatishmërisë për të penguar Rusinë nga çdo agresion kundër NATO-s.
“Ne duhet të rivendosim qëndrimin tonë ushtarak për këtë realitet të ri,” tha të martën Sekretari i Përgjithshëm i NATO-s, Jens Stoltenberg.
Sot mbahet një takim i jashtëzakonshëm i ministrave të mbrojtjes të NATO-s. “Ministrat do të fillojnë një debat të rëndësishëm për masat konkrete për të forcuar sigurinë tonë afatgjatë në të gjitha fushat”, tha Stoltenberg.
Ndërsa të paktën 10 nga aleatët kryesorë të NATO-s, duke përfshirë Shtetet e Bashkuara, Britaninë dhe Francën, kanë vendosur më shumë trupa, anije dhe avionë luftarakë në krahun e tyre lindor dhe i kanë vënë në gatishmëri, Aleanca ende duhet të shqyrtojë se si të merret me situatën e re të sigurisë në Evropë në afat të mesëm. /tesheshi.com/
