Fushata e paralajmëruar nga Kryeministri Edi Rama për të luftuar informalitetin në kompanitë shqiptare, do të ketë disa faza dhe do të drejtohet nga një “forcë speciale” Task Force që përbëhet jo vetëm nga administrata e tatimeve, por edhe nga policia e shtetit, agjencitë inteligjente dhe doganat.
Faza e parë do të jetë një lajmërim një për një i të gjithë bizneseve të mëdha që nuk kanë derdhur sasinë e TVSH-së, apo kanë fshehur bilancet sipas hetimeve paraprake.
Faza e dytë do të jetë një “krehje e territorit” në të gjithë Republikën për të vendosur kasë fiskale në çdo objekt dhe për ta bërë atë të përdorshme, ndërsa faza e tretë do të jetë hartimi i padive dhe dërgimi në prokurori për ata që administrata tatimore ka të dhëna për evazion fiskal.
Ndërkaq me fillimin e sesionit të ri parlamentar Ministria e Financave do të paraqesë në Kuvend një draft të ngjashëm me atë që u bë për debitorët e energjisë, në të cilin do të përcaktohet si krim penal mos pagimi i detyrimeve tatimore.
Qeveria në këtë operacion ka një këshilltar të huaj, i cili ka punaur për një kohë të gjatë të disa vende të Amerikës Latine dhe Afrikën e Jugut kryesisht për të luftuar evazionin fiskal.
Në këtë operacion mësohet se do të përdoren edhe informacionet periodike që ka sjellë Shërbimi Informativ Shtetëror, e në veçanti Task Forca kundër korrupsionit.
Kujtesë për tregtarët
Tregtarët duhet të kenë të gatshme të gjitha pasqyrat e derdhjes tatimore në letër dhe historikun e mandateve, pasi që me prishjen e serverit të tatimeve sistemi eketronik ka shumë probleme dhe ka gjasa të mos gjenden.
E rëndësishme është te kënë përveç bilanceve nga financierët, derdhjen periodike të faturave të TVSH-së, të cilat do të kërkohen të parat, madje edhe para taksave të tjera. TVSH është një taksës që e paguan klienti me blerjen e një malli dhe mos derdhja e saj në shtet nga tregtari, do të konsiderohet si shkelje e rëndë dhe pritet të ketë reperkursione.
Siç mësohet nga burime pranë ministrisë së Financave, ka shumë gjasa që të nxirret amnisti për kamavonesa dhe disa tarifa të tjera, ndërkohë që nuk do të tolerohet për derdhjen e TVSH-së./tesheshi.com/
