Hungaria ia doli ta mposhtë për herë të dytë Norvegjinë brenda pak ditëve, dhe kështu siguroi biletën për në kampionatin europian “Francë 2016”.
Goli i realizuar nga Priskin dhe një autogol i Henriksenit i mundësuan Hungarisë të fitojë 2-1 në ndeshjen e dytë, pasi e kishte fituar të parën 0-1, duke u kualifikuar për herë të parë kështu pas thuajse 30 vitesh në një aktivitet të rëndësishëm ndërkombëtar. Pjesëmarrja e fundit e Hungarisë ka qenë në 1986-ën, në botërorin e atij viti.
Një festë e papërshkruar zë vend në radhët e hungarezëve, ndërsa norvegjezët i ka kapluar pikëllimi për mundësinë e humbur.
Emrat e tre skuadrave të tjera përfaqësuese që do t’i plotësojnë pjesëmarrësit në Francë kanë për t’u mësuar sot e nesër. /tesheshi.com/
