Janë luajtur mbrëmë dhjetë takime në eliminatoret europiane për Kupën e Botës. Golat kanë qenë me shumicë; nuk ka patur as edhe një barazim të vetëm, e jo më një ndeshje që të ketë përfunduar pa tundje rrjetash.
Rezultati më i thellë është regjistruar në “stërvitoren” San Marino – Gjermani: 0-8! Një fitore e thellë e gjermanëve që nuk vjen si surprizë, pasi mendohej të ishte e tillë ndaj një prej përfaqësueseve më të dobëta të kontinentit.
Rezultati më i ngushtë i përket takimit Maltë – Slloveni, të fituar 0-1 nga miqtë.
Anglia fitoi pastër ndaj Skocisë në derbin britanik. Sturridge, Lallana dhe Cahill ishin shënuesit në fitoren e patër 3-0 në “Wembley”.
Franca do ta pësonte fillimisht ndaj Suedisë, për ta kthyer më pas ndeshjen në favorin e saj. “Gjelat” i mposhtën skandinavët 2-1, falë golave të realizuar nga Pogba dhe Payet.
Disi befasuese qe fitorja e Armenisë ndaj Malit të Zi, 3-2; polakët u kthyen me tre pikë nga transferta rumune, pasi i mposhtën vendasit 0-3.
Azerbajxhani kishte patur gjer tani një ecuri pozitive në grupin C të eliminatoreve, por humbja 4-0 në fushën e Irlandës së Veriut e zbriti atë në vend të tretë në klasifikim.
Danimarka mposhti 4-1 Kazakistanin; një tjetër rezultat 4-0 u regjistrua në sfidën Sllovaki – Lituani. Çekia fitoi gjithashtu 2-1 ndaj Norvegjisë. /tesheshi.com/
