Kualifikimet “Francë 2016”: festa është për Sllovakinë dhe Rusinë

Tashmë janë 17 skuadra që kanë “prerë” biletën për në kampionatin europian “Franca 2016”. Është përfaqësuesja e Sllovakisë dhe e Rusisë, që siguruan kualifikimin së fundmi. Në të gjitha grupet situata tashmë është e përcaktuar, e bën përjashtim vetëm grupi H, ku pikët janë ende në lojë.

Spanja i ka bërë një nder Sllovakisë, duke e mposhtur rivalin direkt të saj Ukrainën në Kiev, (1-0). Megjithatë, edhe Sllovakia e ka bërë punën e saj, duke triumfuar në udhëtim ndaj Luksemburgut, (4-2) për të siguruar kualifikimin në Francë nga pozita e dytë e renditjes në tabelë.

Rusia iu bashkua Austrisë në grupin G, në rrugën për në Paris. Kombëtarja ruse mposhti Malin e Zi, (2-0) dhe ruajti vendin e dytë që i mundësonte kualifikimin direkt. Fitorja e Suedisë ndaj Moldavisë, (2-0) ka shërbyer vetëm për statistika, pasi suedezët kualifikimin për në europian do ta kërkojnë përmes play-off.

Në grupin E, situata ishte vendosur që në fundjavën e kaluar

Anglia përfundon eleminatoret si skuadra e vetme me të gjitha ndeshjet e fituara. Albionët kanë mposhtur Lituaninë në udhëtim, (3-0) në ndeshjen e fundit të grupit. Fitore regjistroi gjithashtu dhe Zvicra ndaj Estonisë, (1-0). Slovenia që do të luajë në ndeshjet e play off-it, triumfoi po ashtu në udhëtim ndaj përfaqësueses modeste San Marino, (2-0). /tesheshi.com/