I dorëhequr Ramush Haradinaj ka përvjelë mëngët menjëherë pasi mbërrijti në Prishtinë, pas intervistimit në Hagë.
Ndonëse nuk ka pranuar të flasë për mediat lidhur me përvojën e tij të shkurtër si dëshmitar atje, Haradinaj iu drejtua të gjithëve me një status në rrjetin social Facebook, ku tregon se është kthyer për të vazhduar punën si kryeministër, edhe pse ka dhënë dorëheqje.
Ai këmbënguli se dorëheqja e tij nuk do të thotë se do ta braktisë vendin në këto momente të vështira të siç tha ai “vakumit politik”, duke lënë të kuptohet po të vazhdoj të kryej punët e mbetura në gjysmë.
Në statusin e tij nuk kishte si të mungonte vendosmëria e tij tashmë e njohur për “heqjen e taksës kur të bëhet njohja”, një kusht ky assesi i pranuar nga Serbia.
I dorëhequr të premten e kaluar pas ftesës që iu bë për të marrë pjesë në Hagë në cilësinë e dëshmitarit, Haradinaj shtoi se pafajësinë e tij nuk mund ta vë në pikëpyetje askush.
“I kthehem obligimeve të mia në Kosovë. Vendimi im për dorëheqje dhe veprimet e mia të fundit janë porosi se çfarëdo abuzimi ndaj Kosovës, që vjen, nuk do të na lëkundë nga e drejta jonë sovrane. Kufijtë e Kosovës nuk guxon t’i prekë askush. Kosovës nuk mund t’i imponohet Dodik Republika. Tregu për njohje po, e taksa deri në njohje. Dialog pa kushte, po menjëherë”.
“Dëgjoj zëra se kryerja e detyrave qeverisëse pas dorëheqjes, është jo kushtetuese. Si Qeveri në dorëheqje, ashtu siç e kam cekur edhe në vendimin tim për dorëheqje, do t’i kryejë detyrat, se nuk guxoj të lë vakum qeverisës, sepse Kosova nuk mund t’i bartë pasojat e vakumit qeverisës. Me respekt për ta, palët që mendojnë ndryshe i ftoj t’i drejtohen Gjykatës Kushtetuese. Çfarëdo që të jetë vendimi i Gjykatës Kushtetuese do ta respektoj. Na priftë e mbara!”, ka shkruar ai në Facebook.” /tesheshi.com/
