Të nisura si manifestime për të ngritur zërin ndaj maleve të plehrave të gjendura në çdo rrugë të Bejrutit, protestat kanë marrë tashmë ngjyrim politik me kërkesën për dorëheqjen e qeverisë. Protestuesve u është bashkuar dhe Hezbullahu, një prej aleatëve të qeverisë aktuale, duke e rritur më tepër tensionin në vend.
Ndërsa protestat e udhëhequra nga lëvizja “Mbani erë të keqe” vijojnë prej ditësh, dje qeveria nuk ka arritur t’i japë zgjidhje krizës, pasi në takimin e jashtëzakonshëm vendosi të mos e miratojë një kontratë re të administrimit të plehrave, duke e konsideruar si shumë të kushtueshme.
Forcat policore janë përplasur me protestuesit në qendër të Bejrutit. Një numër protestuesish janë arrestuar, teksa nga të dy palët ka patur të lënduar.
Protestuesit, të mbledhur në sheshin Rijad es-Sulh, kërkojnë tanimë dorëheqjen e kryeministrit Temmam Selam, duke e akuzuar qeverinë se ka bërë fare pak për zgjidhjen e problemit, dhe kanë planifikuar një protestë tjetër masive më 29 gusht.
Ministrat e Hezbullahut dhe të aleatëve të tyre u larguan nga një mbledhje e kabinetit qeveritar, duke i shtënë më shumë benzinë zjarrit të protestave. Hezbullahu po akuzohet se po e shfrytëzon lëvizjen “Mbani erë të keqe” për axhendën e vet politike.
Kriza e plehrave pati nisur që në janarin e vitit të shkuar, për të marrë nota më serioze këtë vit, ndërsa qeveria nuk arriti t’i japë zgjidhje çështjes së gjetjes së një territori të ri për mbledhjen dhe përpunimin e mbeturinave pas mbylljes së atij ekzistuesit.
Që nga mesi i korrikut, mijëra tonë plehra kanë pushtuar Bejrutin, duke e bërë gjendjen të padurueshme.
Ndasitë politike e fetare, të thella historikisht në këtë vend, e kanë lënë prej një viti vendin dhe pa president. Sipas sistemit aktual të ndarjes së pushtetit, posti i presidentit i takon një të krishteri, kryeministri duhet të jetë sunnit, e kryetari i parlamentit duhet të jetë shiit. /tesheshi.com/
