Rezultatet e papritura të zgjedhjeve në Britani sollën dhe dorëheqjet e kryetarëve të tre partive. Ajo çka ndodhi u përshkrua në mjetet e informimit si “52 minutat që tronditën Britaninë”. Vetëm në më pak se një orë pas shpalljes së rezultateve zyrtare të zgjedhjeve, Nigel Farage i UKIP-it, Nick Clegg i liberaldemokratëve dhe Ed Miliband i laburistëve deklaruan dorëheqjet e tyre.
“Britania ka nevojë për një Parti Laburiste të fortë. Eshtë koha për dikë tjetër që të marrë udhëheqjen e partisë,” u tha Miliband mbështetësve të tij në fjalën e dorëheqjes.
“Jam vërtet i brengosur që nuk ia dola. Për pesë vite kam bërë më të mirën time. Unë marrë përgjegjësinë e plotë dhe absolute për rezultatin,” vijoi drejtuesi i dorëhequr i laburistëve.
Kryeministri aktual, David Cameron, e njëkohësisht udhëheqësi i konservatorëve, i fitoi thellë zgjedhjet në mënyrë krejt të papritur, ndërsa të gjitha anketimet parazgjedhore tregonin për një ekuilibër të plotë mes partisë në pushtet dhe laburistëve.
Konservatorët fituan 331 vende në parlament, dhe shmangën nevojën për të bërë koalicion me një parti tjetër për krijimin e qeverisë. /tesheshi.com/
