Kryeqyteti i rinisë muslimane për vitin 2015 do të jetë Stambolli

Organizata e Bashkëpunimit Islam (OIC) e ka shpallur Stambollin si kryeqytetin e rinisë për botën muslimane gjatë vitit 2015. Metropoli turk do të jetë pritës i një sërë aktivitetesh që kanë të bëjnë me çështjet islame, si dhe do të hapë dyert për të rinjtë nga vendet muslimane.

Ministria turke e Rinisë dhe Sporteve dhe OIC-i nënshkruan të premten një protokoll për bashkëpunim në zhvillimin e aktiviteteve. Kështu, maji do të jetë muaji kur do të nisin këto aktivitete, së pari me një program të quajtur, “Të rinjtë takohen në kryeqytetin e tyre”, në të cilin do të marrin pjesë 200 të ftuar nga 60 vende. Pjesëmarrësit do të ndjekin konferenca ku do të flitet për kulturën dhe trashëgiminë e përbashkët të botës muslimane, për luftën ndaj islamofobisë, e për zgjidhjen e konflikteve. Të ftuarit do t’u bashkohen më pas studentëve të huaj që studiojnë në Turqi për t’i rënë rreth e rrotull Stambollit e për të vizituar vendet e tij historike e objektet fetare.

Veç konferencave, aktivitete sportive e kulturore për të rinjtë muslimanë do të ketë në ishullin Gëkçeada (Gökçeada) në detin Egje.

Aktivitetet do të kulmojnë më tutje këtë vit me një tubim në Çanakkale të rinisë muslimane nga vendet anëtare të Organizatës së Bashkëpunimit Islam, teksa Turqia do të organizojë një ceremoni përkujtimore për ata të cilët luftuan në betejat kyçe në bregun e Egjeut gjatë Luftës së Parë Botërore.

Pjesë e programit do të jenë dhe një varg ekspozitash dhe seminaresh mbi artin islam. /tesheshi.com/