Kryepolici “pa asnjë arritje” bën betimin, eprori i tij stërhollon rendin

Ministri i Brendshëm, Ervin Hoxha prezantoi drejtorin e ri të përgjithshëm të Policisë së Shtetit, Ilir Proda, pa theksuar asnjë arritje të tij në karrierë, ana tejet e diskutueshme e emrit të Ilir Prodës në krye të bluve shqiptare.

Ky i fundit tha në aktin e betimit se, “në këtë çast solemn, në respekt të veprës së të gjithë brezave të Policisë shqiptare, në shenjë nderimi, detyrimi dhe respekti për gjakun e punonjësve të Policisë të rënë dhe të plagosur në krye të detyrës, në emër të të gjithë punonjësve të Policisë së Shtetit, të vendosur për të mbrojtur rendin dhe sigurinë publike dhe për të garantuar zbatimin rigorozisht të ligjit, në nderim tim personal betohem për të mbajtur me nder flamurin e Policisë së Shtetit”.

Ministri Hoxha shprehu besimin se drejtori i ri do të sjellë një ritëm dhe një dinamikë tjetër në të gjithë strukturën e Policisë, gjë që pritet të shihet në ditët në vijim.

Ndërkohë, duke folur për një reformë në Policinë e Shtetit, ministri Hoxha foli me fraza të stërholluara të një gjuhe të drunjtë zyrtare deri në mërzi, si:

“E vetmja vështirësi e drejtorit të ri, edhe kjo në aspektin pozitiv, mbetet standardi në të cilën është ngritur performanca e Policisë së Shtetit, e cila duhet të vijë në rritje dhe konsolidim”.

 “Ambicia jonë nuk është rezultat i një dëshire të brendshme, as një ndjesi çasti, por vjen si pasojë e një analize të thelluar të potencialeve që kemi tashmë në radhët e policisë dhe mundësive që kemi për t’u ngritur në një nivel tjetër”.

“Nga sot prej Policisë së Shtetit ne presim, së pari, qëndrueshmërinë e rezultateve, por sidomos rritjen sa më të shpejtë të cilësisë së shërbimit në të gjitha departamentet dhe sektorët”.

“Procesi i reformave në gjirin e organizatës do të zhvillohet duke marrë në konsideratë ecurinë dhe rezultatet e çdokujt, në të gjitha nivelet, me qëllim që ky proces të jetë sa më i dobishëm dhe me efekt në radhë të parë për të të ardhmen e vetë Policisë”.

“Ne duam të arrijmë ato objektiva që i konsiderojmë brenda rrezes së mundësive tona. Unë besoj fort që nuk ka asnjë objektiv të pamundur, sado ambicioz të duket në pamje të parë”.

“Dua që sa më shpejt të formatojmë Policinë e Shtetit, atë që tashmë ka arritur në një standard shumë të lartë, sidomos nën dritën dhe faktin që Shqipëria po hyn në fazën e negocimit për anëtarësimin në BE”.

“Ambicia jonë për të pasur polici të standardeve evropiane, është në të njëjtën linjë me zhvillimet e vendit dhe aspiratave tona të përbashkëta për të ardhmen”.

“Kemi nisur procesin e dorëzimit të stafetës në duart e një gjenerate të re të punonjësve të policisë, të cilët kanë fatin ta nisin punën nga një stad i ri, duke respektuar me mirënjohje të gjithë punën e drejtuesve paraardhës”. /tesheshi.com/