I ngarkuar për herë të dytë për krijimin e një qeverie, por këtë herë të përkohshme, kryeministri në detyrë, Ahmet Davutogllu, i ka paraqitur mbrëmë presidentit emrat e kabinetit të ri.
Qeveria e përkohshme do të ketë detyrën të përgatisë zgjedhjet e parakohshme të 1 nëntorit. Davutogllu, ashtu si më herët, ndeshi në pengesa në formimin e qeverisë. Dy partitë kryesore të opozitës, republikanët e CHP-së dhe nacionalistët e MHP-së refuzuan të marrin pjesë, ndërsa partia e katërt parlamentare, HDP-ja e kurdëve, qe e gatshme të përfshihej në qeverinë e përkohshme.
25 janë postet ministrore në qeverinë e re. Katërmbëdhjetë ministra, duke përfshirë kryeministrin, janë nga partia që i fitoi zgjedhjet e fundit, edhe pse jo me shumicën e duhur për të qeverisur e vetme, AKP-ja, Partia për Drejtësi dhe Zhvillim. Dy ministra i përkasin HDP-së prokurde, një është nga MHP-ja, dhe nëntë të tjerë janë joparlamentarë.
Më spikatësi në qeverinë e re është Tugrull Tyrkesh (Tuğrul Türkeş), i emëruar si një prej katër zëvendësministrave. Tyrkeshi, një deputet i zgjedhur i MHP-së, Partisë së Lëvizjes Nacionaliste, doli kundër vendimit së subjektit të tij politik për të mos marrë pjesë në qeverinë e përkohshme dhe iu përgjigj ftesës së Ahmet Davutogllusë. Tugrull Tyrkesh është i biri i themeluesit të MHP-së, i të ndjerit Alparsllan Tyrkesh, dhe për të kanë nisur tashmë procedurat e përjashtimit nga partia, ndonëse ai është shprehur me gojën e vet se nuk do të largohet assesi.
Një tjetër risi e qeverisë së re është pjesëmarrja në të e të parës ministre me shami koke në historinë e republikës turke. Ajshen Gyrxhan (Ayşen Gürcan) do të jetë ministre e Familjes dhe e Politikave Sociale.
Ministër i Jashtëm është emëruar Feridun Sinirliogllu (Feridun Sinirlioğlu). Një diplomat, ai ka mbajtur detyrën e nënsekretarit në Ministrinë e Punëve të Jashtme deri në caktimin në postin e lartë. Sinirliogllu ka qenë ambasadori i Turqisë në Tel-Aviv në vitet 2002-2007.
Detyrën e ministrit të Punëve të Brendshme do ta kryejë Selami Alltënok (Selami Altınok).
Zgjedhjet e 7 qershorit u fituan nga AKP-ja, por për herë të parë në më tepër se një dekadë ajo nuk qe në gjendje të siguronte numrat e duhur për ta udhëhequr e vetme vendin. Ahmet Davutogllu, i ngarkuar nga presidenti me detyrën e formimit të kabinetit të ri, nuk arriti t’i bindte kundërshtarët politikë të bëheshin pjesë e një koalicioni të madh. Republikanët e CHP-së qenë më të hapur në qëndrimin e tyre, por në fund nuk pranuan të krijojnë një qeveri të përbashkët. Ndryshe tyre, nacionalistët e MHP-së që në krye të herës i mbyllën dyert e bashkëpunimit, duke mos lënë asnjë fije shprese e duke ngjallur dhe zemërim në bazën e tyre.
Me zgjedhjet e reja shpresohet t’i jepet fund ngërçit politik, teksa Partia për Drejtësi dhe Zhvillim e Ahmet Davutogllusë pretendon të kthehet tek shifrat e veta historike, që do ia mundësonin ta qeveriste e vetme vendin.
Turqia është përfshirë në këta tre muaj paqartësie politike nga një valë sulmesh e atentatesh prej PKK-së, organizatës terroriste kurde, të riaktivizuar. I gjithë rajoni në kufi me Sirinë është thuajse në gjendje lufte, e Turqia pranoi ta hapë një prej bazave ajrore për avionët amerikanë e të aleatëve që bombardojnë ISIS-n.
Sektori financiar po ashtu është prekur nga zhvillimet e fundit politike. Ka një zhvlerësim të monedhës vendase ndaj dollarit amerikan, që ka arritur rekordet në raportet me lirën e re turke./tesheshi.com/
