Kryeministri spanjoll Mariano Rajoy fajësoi qeverinë rajonale në Katalonja për trazirat e shkaktuara të dielën, ndërsa u shpreh se ndërhyrja e forcave të policisë ishte në zbatim të vendimit të gjykatës.
Duke i cilësuar si sukses veprimet e dhunshme të policisë kundër mijëra qytetarëve të Katalonjës, Rajoy, tha se nuk ka pasur referendum për vetëvendosje në Rajon.
Ai i bëri thirrje qeverisë rajonale të Katalonjës të mos ndjekë një rrugë që nuk të çon askund.
Me urdhër të qeverisë qendrore spanjolle, policë të armatosur rrethuan në Katalonjë qendrat e votimit dhe u përpoqën pjesërisht me dhunë që t’i ndalonin votuesit që të votonin në referendumin e pavarësisë. Para një qendre votimi në Barcelonë, policët përdorën madje shkopinj gome kundër demonstruesve.
Gjatë përleshjeve pati shumë të plagosur. Qeveria rajonale e Katalonjës tha se ka pasur 761 të plagosur. Sipas shërbimit shëndetësor, dy prej tyre janë në gjendje kritike. Për shkak të dhunës së policisë, kryebashkiakia e majtë e Barcelonës, Ada Colau, bëri thirrje për dorëheqjen e kryeministrit spanjoll Mariano Rajoy.
Ministria e Brendshme në Madrid tha se gjatë përleshjeve ishin plagosur lehtë 11 policë spanjollë që ishin goditur me gurë nga demonstruesit. Sipas ministrisë janë arrestuar shumë vetë.
Më shumë se 5.3 milion vetë qenë ftuar të merrnin pjesë në referendumin për pavarësinë e Katalonjës. Mbi 90 % e pjesëmarrësve në referendum i thanë “po” pavarësisë nga Spanja, pavarësisht se ai nuk ka fuqi detyruese dhe është shpallur i paligjshëm nga Gjykata Kushtetuese spanjolle.
Gjyqtarët i referohen pandashmërisë së shtetit spanjoll të sanksionuar me ligj. /tesheshi.com/
