Ideja e shtetarëve hungarezë për ta mbyllur kufirin me Serbinë me anë të një muri katër metra të lartë, në përpjekje për të ndaluar valën e emigrantëve ilegalë, ka shkaktuar habi dhe zemërim në qarqet politike serbe.
Gjatë një vizite në Oslo, Aleksandër Vuçiç, kryeministri serb, nuk ka nguruar të përgjigjet flakë për flakë, “Jam i habitur dhe i tronditur. Ndërtimi i mureve nuk është zgjidhja. Serbia nuk mund të jetë përgjegjëse për situatën e krijuar nga emigrantët. Ne jemi thjesht një vend kalimi.” Më tej ai ka shtruar një pyetje ironike, “A është Serbia përgjegjëse për krizën në Siri?”
Autoritetet hungareze lajmëruan të mërkurën se do të ndërtonin një mur përgjatë tërë kufirit me Serbinë, të alarmuara me shtimin e numrit të emigrantëve që kalonin në Hungari. Rreth 54.000 refugjatë kanë hyrë në Hungari që në janar, e 95 për qind e tyre kanë kaluar nëpërmjet kufirit me Serbinë.
Vuçiç po ashtu theksoi se vendi i tij nuk do të sillej njëlloj, për të ndërtuar mure me Maqedoninë dhe Bullgarinë. Me fjalët e tij, “Serbia nuk do të ndërtojë mure, nuk do ta izolojë veten.”
Nga ana tjetër, ministri hungarez i Punëve të Jashtme, Peter Szijjarto, deklaroi se Hungaria nuk mund të priste që BE-ja të gjente një zgjidhje për emigracionin. /tesheshi.com/
