PDK-ja as sot në mbedhjen e Kryesisë nuk ka dhënë emrat për kryetar komunash ku lufta më e madhe po bëhet për dy bastionet e saj, Drenasin e Skenderajn, pasi disa kandidatë kanë shprehur interesim.
Por, një grup qytetarësh nga Skenderaj, kryesisht të moshave te reja të vetëquajtur “Reagimi Qytetar” kanë filluar të mbledhin nënshkrime nëpër qytet në mbështetje të Bekim Jasharit, si kandidat i pavarur për kryetar komune.
Këta të rinj, dje dhe sot po kërkojnë nënshkrime dhe deri më tani kanë siguruar rreth 2 mijë firma.
Bekim Jashari, djali i heroit Hamzë Jashari para disa ditësh pohoi se do të futet në garë për kryetar komune, por vetëm si i pavarur, nëse Nuredin Lushtaku nuk kandidohet nga PDK-ja dhe në vend të tij rikandidohet Sami Lushtaku.
Ndërsa kreu aktual, Sami Lushtaku zyrtarisht ende nuk dihet nëse do të përfshihet në garë edhe pse ka rishfaqur ambiciet edhe për një mandat, ndonëse pas lirimit nga burgu kishte thënë se nuk do të kandidonte më.
Kurse Nuredin Lushtaku disa ditë më parë ka thënë se nëse ai nuk do jetë kandidat, do të mbështesë secilin kandidat të pavarur që futet në garë për Skënderajn, por jo atë që propozon PDK-ja. /tesheshi.com/
