Një nga rekomandimet që raporti i ministrave teknikë për zgjedhjet e 25 qershorit është ai mbi zhvlerësimin e monedhës europiane gjatë fushatës elektorale. Ministria e Brendshme, e drejtuar për rreth 3 muaj Dritan Demiraj, ka raportuar ekzistencën e fenomenit të përdorimit të burimeve financiare të dyshimta për blerjen e votave, por në anën tjetër, Drejtoria e Përgjithshme e Parandalimit të Pastrimit të Parave nuk ka njoftuar raste konkrete.
Në raportin e teknikëve, thuhet se kursi i këmbimit të euros ka rënë deri më 27 qershor , duke arritur kështu nivelin më të ulët prej shumë vitesh, për të rifilluar përsëri rivlerësimin.
Në këto kushte, rekomandohet që fenomeni i zhvlerësimit domethënës të monedhës Euro mes datave 19.05.2017 deri në 27.06.2017 të analizohet në mënyrë të thelluar dhe të koordinuar nga institucione kompetente për të analizuar shkaqet dhe për vlerësuar nëse kjo rënie e monedhës Euro është e lidhur me përdorimin e saj në mënyrë informale për shitblerjen e votave apo vepra të tjera penale në fushën e zgjedhjeve.
Raporti ka shkaktuar reagime qoftë nga mazhoranca socialiste, përmes Kryeministrit Edi Rama, ashtu edhe nga PD, përmes kreut Lulzim Basha. Të dy drejtuesit e partive më të mëdha politike në vend, kanë lexime të kundërta për raportin, i cili nuk dihet nëse do të shërbejë thjesht e vetëm në kuadrin e një debati politik, apo do të merret në konsideratë nga institucionet ligjzbatuese në vend.
Shumë nga pikëpyetjet që dalin nga ky raport mund të marrin përgjigje vetëm nëse ato do të trajtohen jashtë konteksit të debatit politik, pra që institucionet ligjzbatuese si dhe ato financiare të analizojnë çështjet që sot janë të përfshira në një dokument që mban firmat e 6 ish-ministrave dhe një ish-zv.kryeministre.
Nëse ai thjesht do të mbetet si një dokument që do të debatohet dhe do të ngrihen akuza të ndërsjellëta, as më shumë e as më pak do të ketë fatin e dhjetra raporteve qofshin për zgjedhje apo çështje të tjera, që janë pluhurosur nëpër sirtarë apo kanë përfunduar në kosh. /tesheshi.com/
