Shefi i Shtabit të Ushtrisë Serbe, gjenerali Ljubisha Dikoviç, gjendet në një proces gjyqësor një gjykatë të Beogradit për krimet e kryera në Kosovë nga ai dhe forcat që drejtonte në vitet 1998-1999.
Gazeta e njohur serbe Danas, e cila ka qëndrime të moderuara dhe opozitare, thekson se trupi gjykues i ka shqyrtuar të gjitha provat e dëshmitë dhe tani është tërhequr për të marrë vendim.
Veprimtarja e njohur e të drejtave të njeriut në Serbi, Natasha Kandiç, ka bërë një akuzë të fortë ndaj Dikoviçit, duke deklaruar se njësia e motorizuar me numër 37 e ushtrisë së Beogradit, e komanduar nga Dikoviç, kreu në Kosovë krime të tmerrshme lufte, si vrasje civilësh, përdhunime, ngacmime seksuale, grabitje dhe tortura.
Ljubisha Dikoviç është dekoruar nga Sllobodan Milosheviçi me titullin e “heroit kombëtar” pikërisht për bëmat e tij në Kosovë.
Pas akuzave të drejtoreshës së Qendrës të të Drejtave të Njeriut, Natasha Kandiç, kryegjenerali serb e ka
paditur atë në gjykatë për shpifje që në vitin 2012.
Procesi ka vazhduar prej dy vitesh, dhe Kandiç “pa iu dridhur qerpiku” ka thënë se akuzat e saj janë të vërteta dhe mbështeten nga të gjitha vendimet e Gjykatës Ndërkombëtare të Hagës kundër disa prej drejtuesve të Serbisë.
Në vitin 2015, pikërisht në mars, presidenti serb, Tomoslav Nikoliç, e dekoroi Dikoviçin me urdhërin e “Shqiponjës së Bardhë” të Klasit të Parë.
Por Natasha Kandiç nuk u tërhoq, ajo deklaroi se qenia e një ushtaraku të tillë si Dikoviç në krye të ushtrisë serbe është totalisht e padenjë. “Të gjitha dokumentet e Gjykatës së Hagës në procesin kundër Milan Milutinoviçit, por edhe dëshmitë e të mbijetuarve të masakrës së Drenicës, janë fakte që flasin mbi përgjegjësitë e Dikoviçit,” ka deklaruar gruaja që urrehet nga radikalët dhe nacionalistët serbë.
Pas këtyre akuzave ka ardhur qëndrimi i prokurorisë serbe për krime lufte, e cila i mohoi pretendimet e Kandiçit.
Por çështja shkoi në gjykatë, dhe pritet që ajo të marrë vendimin nëse do ta dënojë Natasha Kandiçin, apo do t’u japë të drejtë akuzave të saj ndaj kryegjeneralit serb. Përgatiti: Ylli Pata -/tesheshi.com/
