Kroacia ka hapur kufirin e saj me Serbinë, duke eliminuar një nga pengesat kryesore për mijëra emigrantë që përpiqen të vijojnë rrugën e tyre për në veri.
Rreth 3 mijë njerëz kanë ngelur mes motit të ftohtë dhe të lagësht në fshatin kufitar Berkasovo në Serbi, pasi Kroacia vendosi të frenonte hyrjen e refugjatëve.
Agjencia e refugjatëve të OKB-së (UNCHR) ka përshkruar kushtet në të cilat kanë qëndruar refugjatët, si ‘të tmerrshme’. Shumë persona kanë mbetur të bllokuar në afërsi të kufirit Kroaci-Slloveni. Rruga e Ballkanit ka qenë e mbushur me kufizime.
Qindra e mijëra emigrantë, shumë prej tyre nga Siria, Afrika e Afganistani, kanë rrugën nga Turqia në vendet e Ballkanit gjatë muajve të fundit, me idenë dhe qëllimin për të arritur në Gjermani, Suedi apo në vende të tjera të Bashkimit Europian.
Melita Sunjic, zëdhënësja e UNCHR-së, e cila ka qenë e pranishme në pikën kufitare në Berkasovo, tha të Hënën në mbrëmje: “Kufijtë u hapën pa asnjë lajmërim. Të gjithë po nxitojnë”.
Duke përshkruar kushtet në kampet ku refugjatët kanë qëndruar, ajo u shpreh: “Ka pasur shumë fëmijë të vegjël. Ka pasur njerëz me aftësi të kufizuara, njerëz që janë sëmurur gjatë rrugës. Ky nuk është një vend për njerëzit, ata nuk mund të flenë. Njerëzit mund të qëndrojnë zgjuar gjithë natën me këmbët në baltë”./tesheshi.com/
